
इस्लामावाद – पाकिस्तान व भारत दथुइ दँदँ न्ह्यवंनिसें विवादया मुद्दा जुयाच्वंगु काश्मिरया समस्या ज्यंकेया निंतिं प्रस्ताव तयार यायेगु ज्या जुयाच्वंगु दु । पाकिस्तानया प्रधानमन्त्री इमरान खानया सरकारं काश्मिर समस्या समाधानया निंतिं प्रस्ताव तयार यानाच्वंगु सरकारया छम्ह वरिष्ठ मन्त्रीं धाःगु दु ।
मानवअधिकार मन्त्री शिरिन मजारीं छगू टेलिभिजनयात बिउगु अन्तर्वार्ताय् पाकिस्तानी प्रधानमन्त्री खान नेतृत्वया सरकारं काश्मिर विवादया समस्या ज्यंकेत प्रस्ताव तयार यानाच्वंगु धाःगु खः । तर प्रस्ताव छु छु दु धइगु विवरणया बारे धाःसा मन्त्री मजारीं छुं स्पष्ट याःगु मदु ।
काश्मिरया विषययात कयाः इलय्व्यलय् जुइगु संघर्ष दिकेत प्रस्ताव आदर्श सावित जुइगु दावी यासें प्रस्ताव पूर्णरुपं तयार जुइधुंकाः उकियात मन्त्रिपरिषद् व प्रधानमन्त्री खानयात लःल्हायेगु नं मन्त्री मजारीं अन्तर्वार्ताय् धाःगु दु । प्रस्तावित मस्यौदाय् सहमति जुल धाःसा उकियात न्ह्यःने यंकेगु नं मजारीं धाःगु दु । प्रस्तावया मस्यौदा यायेगु ज्या लगभग पूवने धुंकूगु नं वय्कलं धयादीगु दु ।
LEAVE YOUR COMMENTS