‘आलोका’ खिचासहित भिक्षु पुचः येँय्

येँ (नेपालभाषा टाइम्स) – शान्ति, नैतिकता व सचेतनाया सन्देश न्यंकेत विश्वया थीथी देशय् द्वलंद्वः माइल यात्रा याःपिं भियतनामी भिक्षु पन्नाकाराया नेतृत्वया पुचः म्हिगः येँय् थ्यंकः वःगु दु । उगु पुचलय् अन्तर्राष्ट्रिय शान्ति दूतया रुपय् म्हसिउम्ह ‘आलोका’ नांया खिचायात नं नापं हःगु दु । भिक्षुपिं लिसे लिउ लिउ वनाच्वंम्ह खिचा अलोका विश्वय् चर्चित जुयाच्वंगु दु ।

भिक्षुतय् थुगु पुचलं थ्व स्वयां न्ह्यः भारतय् ३ हजार ४ सय किलोमिटर व अमेरिकाय् टेक्सासं निसें वासिङटन तक थ्यंमथ्यं ३ हजार ७ सय किलोमिटर नांगा तुतिं शान्ति पदयात्र याःगु खः । युद्ध व हिंसां प्रभावित वर्तमान विश्वय् शान्ति व सद्भाव न्यंकेगु मू आज्जु कथं यात्रा न्ह्याकूगु खः।

उगु पुचलं म्हिगः खास्ति चैत्य चाःहिउगु खः । वयां लिपा चाबहिली च्वंगु चारुमति बिहारय् वनाः प्रार्थना याःगु खः । म्हिगः हे स्वय्म्भुया आनन्दकुटीइ जूगु छगू विशेष ज्याझ्वलय् ब्वति कयाः स्वयम्भू चैत्यया दर्शन यानादीगु खः । भिक्षुतय् पुचलं म्हिगः हे राष्ट्रपति रामचन्द्र पौडेलयात नापलाःगु खः ।

थौं न्हिनसिया २ बजे उगु पुचः भारतया न्हू दिल्ली जुयाः अमेरिका वनीगु ज्याझ्वः दु ।