असंबरेयात हना व सुभाय् देछा

येँ (नेपालभाषा टाइम्स) – वरिष्ठ सिनेपत्रकार, संकिपा निर्देशक, भाषासेवी विजयरत्न असंबरेयात छगू ज्याझ्वःया दथुइ हनेज्या याःगु दु । वंगु शनिवाः जूगु ज्याझ्वलय् जँलास् येँया ल्वचं पीडित जुयाः वासः याकाच्वनादीम्ह वय्कःयात हनेगु नापं वय्कःयात थीथी ग्वाहालि यानादीपिंत नं सुभाय् दे छाःगु खः ।

विजयरत्न असंबरे ग्वाहालि पुचःया ग्वसालय् जूगु ज्याझ्वः ने वाः देय् दबूया संरक्षक पवित्र वज्राचार्यया सभापतित्वय् जूगु खः । ज्याझ्वलय् देय् दबूया मेम्ह संरक्षकलिसें नेपालभाषा एकेदेमिया चान्सलर नेवाःन्ह्यलुवा मल्ल के . सुन्दर मूपाहांकथं झायादीगु खः । ज्याझ्वलय् मूपाहां चान्सलर मल्ल के. सुन्दरं असंबरेयात हनापौ देछानादीगु खःसा यल महानगर पालिका १६ वडा अध्यक्ष निर्मलरत्न शाक्यं दोसल्ला न्ययेकादीगु खः । नेवाः जागरण मञ्चया कजि सुजिव वज्राचार्यं स्वांमाः क्वखाये कादीगु खः ।

म्येँहालामि पवित्र कसां असंबरेया म्हसीका न्ह्यब्वयादीगु ज्याझ्वलय् वय्कःयात ग्वाहालि याये कथं नेवाः संकिपा राष्ट्रिय दबूपाखें इन्दिरा धिमे मैचा संकिपाया विशेष शोक्यनाः मुंगु ध्यबा असंबरेयात ग्वाहालिकथं लःल्हाःगु खः ।