विदेशीतय्त चीन वयेत अस्थायी रूपं प्रतिबन्ध

चीनं कोरोना भाइरस (कोभिड-१९)या संक्रमण नियन्त्रण यायेगु निंतिं विदेशी नागरिकतय्त चीनय् दुहांवयेत अस्थायी रूपं प्रतिबन्ध तःगु दु ।

चिनियाँ विदेश मन्त्रालयं बिहीवाः जारी याःगु विज्ञप्ति कथं शुक्रवाः चान्हय् निंसें थ्व निर्णय लागू यायेगु खँ धाःगु दु । नापं थुगु विज्ञप्तिइ लिपा जारी जूगु प्रेवशज्ञा नं रद्द जुइगु खँ न्ह्यथनातःगु दु । चीनं थुगु पलाः विश्वन्यंक महामारी जुयाच्वंगु कोरोनाया संक्रमण पनेगु छगू अस्थायी पलाः जक जूगु खँ धाःगु दु ।

चीनया वुहान शहरं शुरु जूगु कोरोना भाइरसपाखें चीन मुक्त जुइधुंकूसां आः पिनं दुहांवयाच्वंपिं नाप थ्व संक्रमण खनेदेवं चीनं थुगु पलाः ल्ह्वंगु खः । चीनय् आः तक ८१ हजार मनूत संक्रमित जुइधुंकूगु दुसा ३ हजार स्वयां अप्व मनूत सीधुंकूगु दु ।

(ने. सं. ११४० चाैलाथ्व ३ / वि. सं २०७६ चैत १४, शुक्रवाः)