ख्वप अस्पताल न्हूगु संरचनाय्

ख्वप – ख्वप अस्पतालयात न्हूगु संरचनाय् यंकेगु निंतिं तयारी शुरु जूगु दु । भक्तपुर अस्पताल विकास समितिं अस्पतालयात न्हूगु संरचनाय् यंकाः सुविधा सम्पन्न भवन निर्माणया निंतिं ज्या शुरु याःगु खः । बेलायती सहयोग नियोग डीएफआईडीया ग्वाहालिं अस्पतालया दक्वं संरचना न्हूकथं पुनःनिर्माण नापं व्यवस्थापन यायेत्यंगु खः ।

स्वास्थ्य तथा जनसंख्या राज्यमन्त्री डा. सुरेन्द्रकुमार यादवं पुनःसंरचनाया उलेज्या यानादीगु खः । राज्यमन्त्री यादवं थ्व स्वयां न्ह्यः सन् २००४ निसें २०१० तक दातृ राष्ट्रपाखें नेपाःया स्वास्थ्य क्षेत्रय् यानादीगु ग्वाहालियात कयाः च्वछायादीगु खः । अस्पताल व्यवस्थापन समितिया नायः मिलन सुवालं स्वनिगः दुनेया सुविधा सम्पन्न अस्पताल खया नं ख्वप अस्पतालयात रिफर अस्पतालकथं जक म्हसीका वयाच्वंगुलिं आः थःपिंसं उगु धारणायात चिइकाः महान् सम्भावना कार्यान्वयनय् वनेत्यनागु दु धयादिल ।

प्रदेश नं. ३ या सामाजिक विकास मन्त्री युवराज मुनालं अनेककथंया हाथ्या फयेमाःसां अस्पतालं राजधानी लिक्क च्वनाः स्वनिगःया उत्तर व पूर्वी लागाया जनताया सेवा यानाच्वंगु खँ कनादिल ।थौं स्वयां ११३ दँ न्ह्यः १९६१ सालय् चायेकूगु अस्पतालं थौंकन्हय् ७५ श्ययाया सुविधा नापं प्रसूतीसेवा बिया वयाच्वंगु दुसा अमेरिकी ग्वाहालिं इमर्जेन्सी कक्ष नं संचालन जुयाच्वंगु दु । ज्याझ्वलय् अस्पतालया मेडिकल सुपेरिटेन्डेन्ट डा. सुधा देवकोटा व दातृ संस्ताया रिचर्ड क्लिकं नं नुगः खँ धयादीगु खः ।

सम्बन्धित बुखँ

LEAVE YOUR COMMENTS