महानगरपाखें निगूकथंया बजाः अनुगमन

येँ(नेपालभाषा टाइम्स)÷येँ महानगरपालिकां न्ह्याका वयाच्वंगु बजाः अनुगमनयात निरन्तरता बीगु जूगु दु । मोहनि नखःयात लक्षित यानाः न्ह्याकूगु बजाः अनुगमन स्वन्तियात नं लक्षित यानाः न्ह्याकीगु जूगु दु । लिसें महानगरं स्वन्ति लक्षित नापं नियमित निगुलिं कथंया बजाः अनुगमनयात नं निरन्तरता बीगु जूगु दु ।

येँ महानगरया उपप्रमुखलिसें बजाः व्यवस्थापन तथा उपभोक्ता हित संरक्षण समितिया संयोजक सुनिता डंगोलं मोहनि नखःयात लक्षित यानाः जूगु बजाः अनुगमनया समीक्षा बैठकय् नवासें अनुगमनया प्रभावकारिताया निंतिं येँ महानगर बजार व्यवस्थापन तथा अनुगमन ऐन, २०७७ या व्यवस्थाकथं महानगरया बजाः अनुगमन निरीक्षक क्वःछीगु खँ धयादीगु दु ।

सन्तुलित बजाः व्यवस्थापन अनुगमनया लिच्वः बांलाःगु वइगु अपेक्षा यासें उपप्रमुख डंगोलं स्वच्छ बजाःया निंतिं योगदान याइपिंत व्यापारय् प्रोत्साहित यायेमाःगु खँय् बः बियादिसें अनुचित ज्यायाइपिंत कडा निगरानी तयेमाः धयादिल । बजाः अनुगमनया निंतिं वाणिज्य विभागपाखें निरीक्षण अधिकृतया अधिकार प्रत्योजनया निंतिं अधिकारीया नां फक्व याकनं सिफारिस यानाः छ्वयेगु प्रक्रिया याकनं न्ह्याकेत नं वय्कलं अधिकारीतय्त इनाप यानादिल । उपप्रमुख डंगोलं प्रक्रियाया विषयलिसें एकीकृत बजाः अनुगमनया खँय् बः बियादिसें अनुगमनय् व्यवसाय दर्ता, नवीकरण स्वयेगु नापं व्यवसाय दर्ता यानाः व मयासे संचालन यायेबलय् छु गज्याःगु जरिवाना जुइ धइगु सूचना हरेक व्यवसायीयात जानकारी दइकथं प्रकाशन यायेत नं बः बियादिल ।

अनुगमनया नामय् छगू हे थासय् तःगूमछिं पुचः वनेबलय् उकिं नकारात्मक सन्देश वनीगु खँय् ध्यान बीत धासें वय्कलं सरोकारवाला सकलें छगू हे पुचलय् समावेश जुयाः अनुगमनय् वनेत नं इनाप यानादिल । प्रमुख प्रशासकीय अधिकृत वसन्त अधिकारीं यक्वसित छक्वलं प्रभाव लाके फइगु क्षेत्रयात छनोट यानाः अनुगमनय् प्राथमिकता बीमाःगु खँय् बः बियादिल ।

येँ महानगरपालिका २० वडाअध्यक्ष राजेन्द्र मानन्धरं स्वनिगःया बजारय् मीत हइगु हलंज्वलंया मू चक्र उत्पादन क्षेत्रपाखें शुरु जुइगुलिं थ्व दक्वं चक्र स्वये फइकथं अनुगमन यायेमाः धयादिल । येँ महानगरं नखःयात लक्षित यानाः व नियमित रुपं दैनिक उपभोग्य बस्तु विक्री वतिरण जुइगु थाय्, ला न्या पसः, डिपार्टमेन्टल स्टोर, होलसेल व खुद्रा खाद्य पसः, डेरी, गोदाम तरकारी तथा फलफुल बजाःया अनुगमन याना वयाच्वंगु दु ।

नेपालभाषा टाइम्स

च्वमिया मेमेगु

• देेउवायात सेना पाखें रेस्क्यु ।
• उपप्रधानमन्त्री प्रकाशमान सिंहया चाक्सिबारीया छेँय् नं ताडफाेड यानाः च्याकाबिल
• प्रधानसेनापति अशाेक सिग्देलं ५ बजे सम्वाेधन याइगु धाःसां थुकिया पुष्टि जूगु मदुनि । सेनां थ्व सम्बन्धय् आःतक छुं न्ववाःगु मदुनि । बरु सेना सहित फुक्क सुरक्षा अंगया प्रमुखपिं व मुख्य सचिव एकनारायण अर्यालं छगू वक्तव्य पिकयाः संवादया माध्यमं समस्या ज्यंकेमाः धाःगु दु ।
• झलनाथ खनालया कलाः रविलक्ष्मी चित्रकारयात म्हय् मि तयाबिउगु समाचार वःगु दु ।
• पुलांम्ह राष्ट्रपति विद्यादेवी भण्डारीया छेँय् नं मि तयाबिउगु दु ।