आः अन्तरिक्षय् नं अमेरिकी सेना

विश्व शक्ति राष्ट्रय् अमेरिकाया नां दकलय् न्ह्यःने वइ । विकसित राष्ट्रलिसें आर्थिक, सैन्य, प्रविधि हरेक ख्यलय् अमेरिकाया नां त्वःफीमखु । उकिसनं शक्ति धायेबलय् सैनिकया उपस्थितियात थुइकेगु याः । अमेरिकाया सैन्य शक्ति तसकं बल्लाः । अमेरिकां जल, स्थल व वायु स्वंगुलिं क्षेत्रय् थःगु सैन्य शक्ति उत्तिकं बल्लाका तःगु दु ।

पृथ्वी थ्व स्वंगुलिं तहय् बल्लाःगु सैन्य शक्ति दुगु अमेरिकां आः अन्तरिक्षय् नं थःपिनिगु सैन्य शक्तिया उपस्थिति क्यनीगु जूगु दु ।
अमेरिकी राष्ट्रपति डोनाल्ड ट्रम्पं रक्षा मन्त्रालय पेन्टागनयात अन्तरिक्षय् नं अमेरिकी सैनिकया उपस्थिति तयार यायेत निर्देशनात्मक आदेश बिउगु दु ।

अमेरिकी अन्तरिक्ष काउन्सिलया छगू ज्याझ्लवःयात संबोधन यायेगु झ्वलय् राष्ट्रपति ट्रम्पं उकथंया आदेश बिउगु खः । ‘अमेरिकाया रक्षा नीतिया सवालय् अन्तरिक्षय् मात्र अमेरिकाया उपस्थिति जक दयां मगाः, अन्तरिक्षय् अमेरिकी दबदबा नं दयेमाः’ ट्रम्पं धाःगु दु ।
यदि अमेरिकां अन्तरिक्षय् सैनिकया उपस्थिति दयेकल धाःसा अन्तरिक्षय् नं वयागु दबदबा सुनिश्चित जुइ ।

थःपिनिगु बिस्कं वायु सेना दयेक दयेकं नं आः अमेरिकां बिस्कं ‘स्पेस फोर्स’ अर्थात अन्तरिक्षय् नं सैन्य बल तैनाथ यायेगु प्रक्रिया न्ह्याकूगु दु । यदि अमेरिकां अन्तरिक्षय् सैन्यबल तैनाथ यात धाःसा थ्व वयागु खुगूगु शाखा जुइ ।