ततःधंगु दल दुने रास्वपाया ‘गं’ न्यानाच्वन
येँ (नेपालभाषा टाइम्स)÷क्वचाःगु उपनिर्वाचन राष्ट्रिय स्वतन्त्र पार्टीया लागिं तसकं उपलब्धीमूलक जुल । उलि जक मखु, तनहुँ व चितवनय् उगु पार्टीया उम्मेदवारतय्सं हःगु भारी मतं नेपाःया राजनीतिया ख्वाःपाः हे हिलीगु खः लाकि धइगु संकेत समेत खने दया वःगु दु ।
तनहुँ–१ य् डा. स्वर्णिम वाग्ले व चितवन–२ लय् रवि लामिछाने अतिकं अप्वः भोट हयाः निर्वाचित जुयादीगु दु । मंसिरय् जूगु चुनावय् हःगु भोट स्वयां नं अप्वः भोट हयाः थुगुसी लामिछाने निर्वाचित जुयादीगु दु । वय्कःया निकटम प्रतिद्वन्द्वी नेपाली कांग्रेसया जीतनारायण श्रेष्ठं सिबें लामिछानें ४२ हजार ९६२ भोट अप्वः हःगु खः । निम्ह निकटम प्रतिद्वन्द्वी दथुया थ्व मतान्तर थः हे छगू कीर्तिमान खः ।
उखे तनहुँ–१ य् नं डा. स्वर्णिम वाग्ले करिब ४० हजार मतया अन्तर हयाः निर्वाचित जुयादीगु दु ।
रास्वपाया निम्ह उम्मेदवारतय्त वःगु थ्व ऐतिहासिक मतं नेपाःया भविष्यया राजनीतिक नक्सा हे हिलाबुला जुइ फइगु संकेत खने दया वःगु दु । वय्कःपिं निम्हेसितं एमाले, माओवादी व कांग्रेस थेंज्याःगु स्वंगुलिं तःधंगु पार्टीया परम्परागत भोट वंगु खनेदु । थुकिं आः थ्व तःधंगु पार्टीतय्गु म्याद क्वचाःगु व न्यादँ लिपा जुइगु संसदीय चुनावय् रास्वपा छगू तःधंगु हे हाथ्या जुयाः पिहां वये फइगु विश्लेषण याना हःगु दु ।
थ्वहे झ्वलय् प्रमुख प्रतिपक्षी एमालें न्यादँ लिपा जुइगु चुनावय् रास्वपालिसे गठबन्धन याये फइगु सम्भावना अप्वया वंगु खँ धयाहःगु दु । थ्व चुनावय् एमाले अध्यक्ष केपी ओलीं रास्वपायात गनं हे आक्रमण मयाःगुया कारण थ्वहे जूगु खँ धयाहःगु दु ।
LEAVE YOUR COMMENTS