ने. सं. ११४४ ञलाथ्व नवमी -

मनू ल्ह्ययेगु ज्याय् मेडिकल माफिया !

येँ – स्वनिगलय् पिने जिल्लायापिं मनूतयत चान्हय् चान्हय् सुनां मखंक त्वःता थकेगु ज्याय् मेडिकल माफियातयगु ल्हाः दुगु आशंका याना हःगु दु । पिने जिल्लां म्हमसिउपिं मनूत दुहां वल धायेसातकि वयागु सम्पर्कय् वःपिं फुकस्यां कोरोना परीक्षण याये मालीगु व अज्याःगु इलय् थःपिनि स्वास्थ्य परीक्षण सम्बन्धी वासःत यक्व बिक्री जुइगु जूगुलिं स्वनिगलय् मनू ल्ह्ययेगु ज्याय् मेडिकल माफियात हे सुनियोजित रुपं लगे जुयाच्वंगु अनुमान याना हःगु खः ।

पिने जिल्लायापिं मनूतयत स्वनिगः दुने हयेगु ज्याय् थौंकन्हय् थीथी अस्पताल व निजी क्षेत्रया एम्बुलेन्सत प्रयोग जुयाच्वंगु दु । एम्बुलेन्सतयसं विरामी ल्ह्ययागु धाधां पिने जिल्लायापिं मनूतयत येँय् हयाः त्वःतेगु यानाच्वंगु दु । सूत्रतयसं धाःकथं मेडिकल माफियातयगु पहुँच व सम्पर्कया आधारय् हे थ्व ज्याय् एम्बुलेन्सया समेत दुरुपयोग याये फुगु खः ।

कोरोना परीक्षण यायेगु लागिं सरकारयाके माक्व साधन मदुगु जुयाः परीक्षण याके माःपिं मनूत बाध्य जुयाः निजी क्षेत्रया शरणय् वने मालीगु अवस्था दु । थ्वहे इलय् निजी क्षेत्रय् पीसीआर कोरोना परीक्षण याकेगु खःसा १५,००० तका तुइ धकाः प्रचार नं याना हःगु दु । छखे पिनेयापिं मनूतयत स्वनिगलय् त्वःते हयाः आतंक सिर्जना यायेगु व मेखे कोरोना परीक्षणया मूल्य सार्वजनिक यानाः विज्ञापन यायेगु थ्व ज्या मेडिकल माफियातयसं हे सुनियोजित रुपं न्ह्याकाच्वंगु खँ विज्ञ सूत्रं धाःगु दु ।

थौंकन्हय् स्वनिगः दुने विरामी व उमि कुरुवातयत हयागु धकाः एम्बुलेन्सतयसं न्हिं ४०० म्ह मनूतयत स्वनिगः दुने हयाः त्वःतेगु यानाच्वंगु दु । एम्बुलेन्सतयसं अज्याःपिं मनूतयत अस्पतालय् त्वःतेगु मखुसें लँय् हे त्वःता थकेगु यानाच्वंगुलिं नं उमिसं थ्व ज्या सुंलिसे मिले जुयाः हे यानाच्वंगु खनेदु धकाः सूत्रं धाःगु दु ।

पिनें वःपिं मनूत गन गन च्वन धाल अन च्वंपिं मनूत तसकं आतंकित जुयाच्वंगु दुसा उपिं कोरोना परीक्षण यायेत थीथी स्वास्थ्यकेन्द्रय् ब्वाँय् वनेत बाध्य जुयाच्वंगु दु ।

पिनेयापिं मनूतयत स्वनिगः दुने हयेगु क्रम तसकं अप्वल, उमित पने माल धकाः स्वनिगःया थीथी नगरपालिकातयसं छुं न्हि न्ह्यः मंकाः रुपं हे गृह मन्त्रालययात इनाप याःगु खः । स्वनिगःया नगरपालिका फोरमं अज्याःगु इनाप यायेवं गृह मन्त्रालयं आः स्वनिगलय् दुहां वयेत आरडीटी टेस्ट यानातःगु भ्वं क्यनेमाः धकाः न्हूगु नियम सार्वजनिक याःगु दु । तर गृहं सुचं छगू सार्वजनिक यानाः सुयातं कारवाही धाःसा मयाःगु कारणं पिनें दुहां वइपिंत नियन्त्रण याये मफयाच्वंगु खँ सीदुगु दु । म्हिगः छन्हुया दुने हे स्वनिगलय् थीथी कथंया सवारी साधन मार्फत २५०० म्ह मनू दुहां वःगु खँ प्रहरीं धाःगु दु ।

गृह मन्त्रालयपाखें जारी याःगु सुचंया पालना मयाइपिंत कारवाही यायेत नं सर्वसाधारणपाखें दबाब बिया हःगु दु । यदि गृहया नियम पालना मयासे पिनेयापिं मनूत दुहां वल व उमित गृहपाखें नं छुं कारवाही मयात धाःसा स्थानीय जनता थःपिंसं हे कारवाहीया पलाः न्ह्याके माली धइगु ख्याच्वः नं आक्रोशित मनूतयसं बियाहःगु दु । पिनेयापिं मनूत स्वनिगलय् दुहां वयेधुंकाः उपिं गन वन, गन च्वन धइगु बारे गनं छुं अभिलेख मदुगु जुयाः उपिंपाखें तःधंगु खतरा उत्पन्न जुइगु आशंका समेत जुयाच्वंगु दु ।