चोभारया सुख्खा बन्दरगाह विरुद्धया उजुरी विश्व बैकय् दर्ता

येँ – चोभारय् दयेकाच्वंगु सुख्खा बन्दरगाहपाखें प्रभावित समुदायं बिउगु उजुरीयात परियोजनाया वित्तिय दाता विश्व बैंकं दर्ता याःगु दु । अनया प्रभावित समुदायया प्रतिनिधितय्सं बिउगु उजुरी विश्व बैंकया स्वतन्त्र संयन्त्र इन्सपेक्सन प्यानलं दर्ता याःगु खः ।

प्रभावित क्षेत्रया स्थानीय प्रतिनिधित मिलेजुया नीस्वनातःगु चोभार संरक्षण समितिं परियोजना निर्माणया झ्वलय् विश्व बैंकया नीति उल्लंघन यानाच्वंगु धासें उकीया अनुसन्धान यानाः उपयुक्त पलाः ल्ह्वने माग यासें लच्छि न्ह्यः उजुरी बिउगु खः । समितिं तुरुन्त सुख्खा बन्दरगाहाया बजेट निकासा व फुक्कं निर्माण गतिविधि दिकेत व वैकल्पिक योजना मालेत इनाप यासें उजुरी दर्ता याःगु खः ।