देउवां मेगु गठबन्धन दयेकीगु !

येँ – एमसीसीया कारणं सत्तारुढ दलतय् दथुइ हे थवंथवय् खटपट शुरु जूगु दु । थुकियात मदयेका छ्वयेत आः सहलह नं शुरु याना हःगु दु ।

थ्व झ्वलय् सत्तारुढ गठबन्धनय् दुथ्याःगु माओवादी केन्द्रया अध्यक्ष पुष्पकमल दाहाल, नेकपा (एस) या अध्यक्ष माधव नेपाल व जसपाया नेता लिसें संघीय मामिला तथा सामान्य प्रशासन मन्त्री राजेन्द्र श्रेष्ठ दथुइ सहलह जूगु दु । वय्कःपिनिगु दथुइ गठबन्धनयात गथे यानाः ल्यंका तयेगु धइगु बारे सहलह जूगु खँ धाःगु दु ।

सहलह लिपा पत्रकारतलिसे खँ ल्हासें माओवादी अध्यक्ष दाहालं गठबन्धनय् घाः मजुइक एमसीसीयात गुकथं निकास बीगु धइगु बारे सहलह जूगु खँ कनादिल । फयांफछि न्यागू दल दथुइ छगू हे मत जुइ कथं सहलह जूगु खँ नं वय्कलं कनादिल ।

थ्व झ्वलय् म्हिगः प्रधानमन्त्री शेरबहादुर देउवां वैकल्पिक गठबन्धन दयेकेगु नितिं तयारी याःगु खँ नं पिहां वःगु दु । प्रधानमन्त्री देउवा, माओवादी अध्यक्ष दाहाल व नेकपा एसया अध्यक्ष नेपालं वंगु शनिवाः जूगु सहमति अःखः एमसीसीया विपक्षय् मतदान यायेगु निर्णय यायेवं प्रधानमन्त्री देउवां वैकल्पिक गठबन्धन दयेकेगु कुतः याःगु खँ सूत्रं धाःगु दु । थ्व झ्वलय् देउवां बिहीवाः एमाले अध्यक्ष केपी अाेलीयात नापलाःगु दु । थ्वयां न्ह्यः वय्कलं कांग्रेसया नेता मिनेन्द्र रिजालयात वैकल्पिक गठबन्धन बारे खँ ल्हायेत एमाले अध्यक्ष केपी ओलीयाथाय् छ्वःगु खः । रिजाल म्हिगः सुथय् हे ओली निवास बालकोट वंगु खःसां ओलीं धाःसा थुकी ठोस लिसः मबिउगु खँ धाःगु दु । वयां लिपा सञ्चारमन्त्री ज्ञानेन्द्रबहादुर कार्कीं अध्यक्ष ओलीयात फोन यानाः खँल्हाबल्हा यानादीगु खःसा उगु इलय् नं ओलीं ठोस लिसः मबिउगु खँ सूत्रं धाःगु दु ।

वंगु शनिवाः जूगु समझदारी कथं प्रधानन्यायाधीश चोलेन्द्र शम्शेर जबरा विरुद्ध महाभियोग दर्ता जूसां नं माओवादीया कारणं बुधवाः एमसीसी टेबल मजुइवं प्रधानमन्त्री देउवा तंचाःगु खःसा देउवां वैकल्पिक सत्ता गठबन्धन यायेफइगु खँयात थुइकाः म्हिगः अध्यक्ष दाहाल बालुवाटारय् वनाः थःपिं सरकारं पिहां वःसां नं प्रधानमन्त्रीयात बियाच्वनागु समर्थन धाःसा लित मकायेगु खँ धयादीगु खः ।

एमसीसी पास जुल धाःसा सरकार हे क्वःदलीगु अवस्था वःगु जूगुलिं प्रम देउवां ओलीपाखे नं ग्वाहालिया ल्हाः बियाच्वंगु खँ पिहां वयाच्वंगु दु ।

सम्बन्धित बुखँ

LEAVE YOUR COMMENTS