हलिं नेवाःया न्यूयोर्क घोषणा

येँ (नेपालभाषा टाइम्स)- अमेरिकाया न्यूयोर्कय् नकतिनि क्वचाःगु हलिं नेवाः दबू (वल्र्ड नेवाः अर्गनाइजेशन–डब्लुएनओ) या प्यक्वःगु तःमुँज्यां थःपिनि ‘न्यूयोर्क घोषणा’ जारी याःगु दु । १० बुँदा दुगु न्यूयोर्क घोषणा जारी यासें हलिं नेवाः दबूया प्यक्वःगु तःमुँज्या समापन याःगु खः ।

हलिं नेवाः दबूपाखें जारी याःगु न्यूयोर्क घोषणाया न्हापांगु बुँदाय् थौंकन्हय् नेपाःया थीथी लागाय् नेवाः सम्पदा व संस्कृतिइ जुइगु अतिक्रमणप्रति चिउताः प्वंकुसें उकियात तुरुन्त दिकेत आह्वान यानातःगु दु ।

अथे हे उगु घोषणाय् सरकारं हयेत्यंगु गुथि विधेयकं नेवाःतय् गुथियात प्रभावित याये मदइगु, कोरोनापाखें प्रभावित नेवाः समुदाय प्रति चिउताः तयेमाःगु, नेपालभाषा संरक्षणया लागिं हलिमं हे ग्वाहालि यायेमाःगु, डब्लुएनओपाखें न्हिंन्हिं प्रशारित अन्तर्वार्ता ज्याझ्वःयात ग्वाहालि याये माःगु, नेवाः ल्याय्म्हतय्त नं नेवाः नेतृत्वय् हयेमाःगु, नेवाः गतिविधिइ मिसापिनि सहभागिता अप्वयेकेमाःगु, नेवाःतय् आर्थिक उन्नतिया लागिं अन्तर्राष्ट्रिय रुपं लगानीया वातावरण दयेकेमाःगु, भाषा संस्कृति म्वाकेत हलिंन्यंकं चायेकातःगु नेवाः खलः पुचःयात ग्वाहालि यायेमाःगु व हलिंन्यंकंया नेवाःतय्सं विविधताय् एकता धइगु नारायात सार्थक यानाः न्ह्याः वनेमाःगु खँ न्ह्यथनातःगु दु ।

हलिं नेवाः दबूया प्यक्वःगु तःमुँज्यां बेलायतय् च्वनादीम्ह संयुक्त श्रेष्ठयात नायः पदय् ल्यःगु खः । अथे हे वरिष्ठ उपाध्यक्ष समिर महर्जन, उपाध्यक्ष रजनी प्रधान, सामन्तश्री रत्न वज्राचार्य, कमल श्रेष्ठ, महासचिव शोभित शाक्य, मू दुजः नरेश शाक्य, रमेशमान मुनिकार, शैलेन्द्र मानन्धर, सुदयराज शिलाकार, सुरेन्द्रभक्त श्रेष्ठ, सुरेन्द्रमान शाक्य, दीपेश शाक्य व दीपक डंगोल निर्वाचित जुयादीगु खः ।