याकनं रेल दयेका बीत चीनयात इनाप

येँ (नेपालभाषा टाइम्स) प्रधानमन्त्री पुष्पकमल दाहालं चिनियाँ रेल निर्माण प्रक्रिया याकनं क्वचायेकेत चीन सरकारयात इनाप यानादीगु दु । म्हिगः पोखरा अन्तर्राष्ट्रिय विमानस्थलया उलेज्या यासें वय्कलं चिनियाँ लगानीया तःधंगु परियोजनां नेपाःमितय्त रोजगारी व समृद्धिया मौका बीगु खँ कनादिल । चिनियाँ रेलवे दयेकेत थौंकन्हय् येँय् चिनियाँ पुचलं अध्ययन यानाच्वंगु दु ।

प्रम दाहालं धयादिल, ‘आः चीनं नाका चायेकेगु व रेलवे दयेकेगु नितिं फुक्कं प्रक्रिया न्ह्यःने न्ह्याकूगु दु । मेगु तःधंगु परियोजना नं न्ह्याःगु दु, जिं चीन सरकारयात इनाप यानाच्वना, थुकियात याकनं क्वचायेकाः नेपाःमि ल्याय्म्हतय्त रोजगारी व जनताया समृद्धिया आशा पूवंकेत ग्वाहालि यानादी ।’

उकथं हे प्रधानमन्त्री दाहालं याकनं हे निजगढ विमानस्थल दयेकेगु ज्या न्ह्याइगु खँ नं कनादिल । वय्कलं नेपाः थेंज्याःगु भूपरिवेष्ठित देशय् हवाई मार्ग दकलय् प्रभावकारी जूगुलिं निजगढ विमानस्थल दयेकेमाःगु खँ धयादीगु खः ।

अथे हे वय्कलं आः पोखरा आपालं राष्ट्रलिसे तप्यंक सम्पर्क याये फइगु केन्द्र जूगु धासें थुकिं गण्डकी प्रदेश व नेपाःया हे अर्थतन्त्र विकासय् महत्वपूर्ण योगदान जुइगु बिचाः नं प्वंकादिल । पोखरा विमानस्थल चिनियाँ त्यासाय् दयेकूगु खः । आः नेपालय् येँ, पोखरा व भैरहवा यानाः स्वंगू अन्तर्राष्ट्रिय विमानस्थल दत ।