प्रधानमन्त्री थौं विश्वासया मत काइगु, झिगू दलया समर्थन
येँ (नेपालभाषा टाइम्स)÷ प्रधानमन्त्री पुष्पकमल दाहालं थौं विश्वासया मत काइगु जूगु दु । राष्ट्रपति निर्वाचन लिपा नेकपा एमाले व राप्रपां सरकारयात बियातःगु समर्थन लित कायेवं प्रधानमन्त्री दाहालं थौं हाकनं विश्वासया मत कायेत्यंगु खः । थौं १ बजे च्वनिगु प्रतिनिधिसभाया बैठकय् प्रधानमन्त्री दाहालं विश्वास मत कायेत्यंगु खः ।
नेपाली कांग्रेस, रास्वपा व लोकतान्त्रिक समाजवादी लिसें झिगू दलं प्रधानमन्त्री दाहालयात विश्वासया मत बीगु जूगु दु । नेपाली कांग्रेसया संसदीय दलया म्हिगः च्वंगु बैठकं प्रधानमन्त्री दाहालयात विश्वासया मत बीगु निर्णय यासें सांसदतय्त ह्वीप जारी याःगु दु । कांग्रेसं सरकारयात विश्वासया मत बीगु लिसें सरकारय् ब्वति कायेगु निर्णय याःगु खः ।
उकथं हे लोकतान्त्रिक समाजवादी पार्टीं नं प्रधानमन्त्री दाहालयात विश्वासया मत बीगु निर्णय याःगु दु । लोसपाया म्हिगः च्वंगु संसदीय दलया बैठकं प्रधानमन्त्री दाहालयात विश्वासया मत बीगु निर्णय यायेगुया लिसें सरकारय् वनेगु निर्णय याःगु जानकारी पार्टीया वरिष्ठ नेता राजेन्द्र महतों बियादीगु दु । पत्रकारत लिसे खँ ल्हायेगु ल्हायेगु झ्वलय् महतों धयादिल, ‘पार्टीं प्रधानमन्त्रीयात विश्वासया मत बीगु निर्णय याःगु दु । विश्वासया मत बीधुंकाः सरकारय् ब्वति कायेगु लँपु चाली ।’
अथे हे राष्ट्रिय स्वतन्त्र पार्टीं नं प्रधानमन्त्री दाहालयात विश्वासया मत बीगु निर्णय याःगु दु । रास्वपाया केन्द्रीय समिति व संसदीय दलया म्हिगः च्वंगु मंकाः बैठकं प्रधानमन्त्री दाहालयात विश्वासया मत बीगु निर्णय याःगु खः । उकथं हे नेकपा एकीकृत समाजवादी नं प्रधानमन्त्री दाहालयात विश्वासया मत बीगु निर्णय याःगु दु । नेकपा एसं नं विश्वासया मत बियाः सरकारय् ब्वति कायेगु निर्णय याःगु खः ।
थ्वहे झ्वलय् प्रधानमन्त्री दाहालं थौंया प्रतिनिधिसभा बैठकय् थःत शतप्रतिशत सांसदपिसं विश्वासया मत बीगु आशा तयागु खँ धयादीगु दु । म्हिगः प्रतिनिधिसभा बैठकं पिहां वयेगु झ्वलय् सञ्चारकर्मीत लिसे खँ ल्हायेगु झ्वलय् उगु विश्वास प्वंकादीगु खः ।
प्रधानमन्त्री दाहालं थ्व स्वयां न्ह्यः थत ९९.२५ प्रतिशत सांसदतय्सं विश्वासया मत बिउगु खँ धासें थौं १ सय प्रतिशत मत वइगु विश्वास प्वंकादीगु खः ।
LEAVE YOUR COMMENTS