भारत नाप उच्चस्तरीय संवाद यायेत प्रधानमन्त्रीयात सुझाव

येँ – भारतं नेपाःया लँपुया जुयाः चीनया मानसरोवर तकया सतक निर्माण याःगु विषयलय् उच्चस्तरीय संवाद यायेत थीथी राजनीतिक दलया नेतातय्सं प्रधानमन्त्री केपी शर्मा ओलीया सुझाव बिउगु दु ।

प्रधानमन्त्री ओलीं बुधवाः सःतादीगु सर्वदलीय मुँज्याया झ्वलय् अधिकांश नेतातय्सं भारतं अतिक्रमण याःगु क्षेत्र लितकायेगु निंतिं उच्चस्तरीय संवाद यायेमाःगु खँय् बः बिउगु खः । भारत नाप प्रभावकारी रुपं कूटनीतिक पलाः ल्ह्वनेमाःगु व उकीया निंतिं देय् दुने नं छगू सम्झदारी निर्माण यायेमाःगु सुझाव नं नेतातय्सं बिउगु खः ।

पुलांपिं प्रधानमन्त्री व संसदय् दुथ्याःगु दलया अध्यक्षत दुथ्याःगु मुँजयाय् नेताय्सं नेपाःया थःगु भूभागया बारे सरकार प्रभावकारी जुयाः न्ह्याः वंसा उकी जनतां समर्थन याइगु खँ धाःगु खः । नेतातय्सं देय् दुने व्यक्तव्य जक लिकानाच्वनेगु स्वयां तुरुन्त वार्ताया निंतिं पलाः ल्ह्वनेत सरकारया इनाप याःगु खः ।

मुँज्याय् प्रधानमन्त्री केपी शर्मा ओलीं लिपुलेक नेपाःया भूभाग जूगु धयादिसें सरकार कूटनीतिक संवाद मार्फत हे समस्या समाधान यायेगु पक्षय् दुगु धयादिल । भारतं कोरोनाया संक्रमण लिपा जक संवाद यायेत धयाच्वंगु जूसां नेपालं उगु ई तक पीमफइगु व संवादया निंतिं कुतः जुयाच्वंगु वय्कलं धयादिल । वय्कलं सरकारं फुक्क राजनीतिक दलनाप सहलह यानाः व जनताया समर्थन कयाः न्ह्याः वनेगु प्रतिबद्धता नं प्वंकादिल ।