नेवाः स्टारतय्गु न्हूगु पलाः
नेवाः फिल्मख्यः न्हापासिबें तब्या जुयावयाच्वंगु दु धकाः बय्बय् जुयाच्वंगु थ्व इलय् जम्मा शुटिंग जुयाच्वंगु फिल्म धइगु छगू “जातः” खःसा मेगु “क्या फसाद” खः । “क्या फसाद” फिल्मय् फिल्मया हे निर्देशक बासु शाही हिरो जुयाः म्हिताच्वंगु दुसा रजनी खडगी हिरोइन जुयाः म्हिताच्वंगु दु । “जातः” फिल्मया खँ ल्हायेगु खःसा थुकी निकी महर्जनया नापनापं ज्योति मानन्धर नांयाम्ह हिरोइन थ्व ख्यलय् खनेदयेकः वयेत्यंगु दु । “तिनतिकः महाबिकः” फिल्मं डेब्यु याःम्ह निकी महर्जन थौंकन्हय् विशेष यानाः म्युजिक भिडियो म्हिताच्वंम्ह हिरोइन खः । निकी जक मखु नेवाः कलाकारतय्गु व्यस्तता धइगु नेवाः म्येया म्युजिक भिडियोपाखे हे अप्वयाच्वंगु दु । रजनी खड्गी नं म्युजिक भिडियोपाखे हे व्यस्तम्ह खःसा “समयबजि” नांयागु टेलिभिजन ज्याझ्वः नं म्हिताच्वंम्ह खः ।
“रश्मी”फिल्मया स्टार
थौंकन्हय् नेवाः फिल्मया शुटिंग उलि जुयाच्वंगु मदुगुलिं आपालं कलाकारत सुलं च्वनाच्वंगु हे खनेदु । च्वय् न्ह्यथना कथं छुं छुं स्टारत धाःसा म्युजिक भिडियोया शुटिंगय् व्यस्त जुयाः जूसां थःगु कलाकारिताया प्याःचाः लंकाच्वंगु दु । नेवाः फिल्मया हिरोया रुपय् थःगु बिस्कं हे म्हसीका दयेकेत ताःलाःम्ह राजु महर्जन फिल्मय् खनेमदुगु ताः दयेधुंकल । निदँति न्ह्यः “रश्मी” नांयागु फिल्मं कमब्याक जुइन धकाः बय्बय् जूगु खःसां राजु महर्जनया थ्व फिल्म धाःसा आःतक पिहां वयेमफुनि । आः वयाः राजु महर्जनं मेगु छगू फिल्म “घोषक” नं म्हितूगु दु । बुद्धकालिन थ्व फिल्मया शुटिंग आः याकनं हे क्वचायेत्यंगु दु । “रश्मी” फिल्मय् म्हितूम्ह सुरज व्यन्जनकारया पलाः धाःसा “जामनः गुभाजु”, “च्वापुफय्” व “लाखेभाजु” तक थ्यन ।
आशिष्मा नकःमि व भिन्तुना जोशी
“रश्मी”फिल्मं हे कमब्याक जुइम्ह धका बय्बय् जूम्ह हिरोइन आशिष्मा नकःमिया नं उगु फिल्म पिहां वये लिबाःबलय् कमब्याक हे जुइमफयाच्वंगु दुसा थगुने वय्कः मय्जुं थःम्हेसियागु प्रोडक्शन हाउस चायेकाः “लाखेभाजु” नांयागु फिल्म नं दयेकल । थ्व फिल्मया शुटिंग क्वचाःगु ताः दयेधुंकलं नं थ्व फिल्म पिहां वइगु छुं खँ न्यनेमदुनि । झन उकिसनं थगुने आकाझाकां आशिष्माया इहिपा जूबलय् थ्व फिल्मया ज्या न्ह्याःवने मफुत । थौंकन्हय् आशिष्मा नं मेपिं थें हें तुं म्युजिक भिडियो नं म्हिताच्वंगु दुसा गनं वय्कः मय्जु थः जहानया कर्मभूमि अमेरिकाय् जकं वना छ्वइगु मखुला धइगु नं हुइनाभुइना जुयाच्वंगु दु ।
आशिष्मा नकःमि थें हे तुं नेवाः फिल्मया लोकंह्वाःम्ह छम्ह हिरोइन भिंतुना जोशी नं खः । थौंकन्हय् आपाः यानाः विदेशय् जक वनाच्वनीम्ह भिन्तुना जोशीं “मां” नांयागु छगू फिल्म म्हितीगु खँ दु । थगुने हे घोषणा जूगु थ्व फिल्मया शुटिंग धाःसा आःतक नं न्ह्याये मफुनि । थ्व फिल्मय् किशोर खड्गी हाकनं छक्वः हिरोया रुपय् खने दयेकः वयेत्यंगु दु ।
निम्ह किशोर
न्हापा “झस्का” व “थःम्हं म्हूगु गाः” फिल्म म्हितूम्ह किशोर खड्गीया कमब्याक फिल्म कथं कयातःगु “मां” या शुटिंग शुरु मजूनिसा मेम्ह किशोर अर्थात “बसन्त ऋतु” फिल्मं डेब्यु याःम्ह किशोर चिपालु आः वयाः “घोषक” फिल्मय् नं खनेदयेकः वयेत्यंगु दु ।
निगः थां
नेवाः फिल्म व कलाकारिता ख्यलय् हे नुगः क्वसायेका वयाच्वंम्ह सुरेन्द्र तुलाधर विशेष यानाः टेलिभिजन ज्याझ्वः “ख्वताबजि”या ज्याय् हे व्यस्त खनेदुसाः वय्कलं दयेके धकाः घोषणा यानादीगु “जेण्टलमाएन”या शुटिंग नं आः तक शुरु जूगु मदुनि । नेवाः फिल्म ख्यःया निगः थां कथं कयातःपिं मध्ये छम्ह सुरेन्द्र तुलाधर खःसा मेम्ह आर्यम नकःमि खः । आर्यम नकःमिया निर्देशनय् दयेकूगु “लाखेभाजु”या ज्या दिनाच्वंगु अवस्था दुसा थौंकन्हय् वय्कः खँय् भाय्या टेलिसिरियल “माफ गर्नोस म्याडम”य् व्यस्त जुयाच्वंगु दु ।
सुपर स्टारतय् खँ
नेवाः सुपरस्टार धेंधेंबल्लाखय् लानाच्वंपिं मध्ये आपालं कलाकारत म्युजिक भिडियोपाखे व्यस्त जुयाच्वंगु खनेदुसा सुरज व्यञ्जनकार, रजनी खडगी, रोजिना सुवाल, रुपेन्द्र श्रेष्ठया व्यस्तता नं विशेष यानाः उखेपाखे हे खनेदयाच्वंगु दु । उकी मध्ये रुपेन्द्र श्रेष्ठ व सुरज व्यञ्जनकारया “च्वापुफय्” व “लाखेभाजु” पिहां वयेत्यंगु दुसा सुरज व्यञ्जनकार “मां” फिल्मय् नं म्हितीगु जूगु दु । सुपरस्टार कासाया नोमिनेशनय् लानाच्वंपिं मध्ये भोगेन्द्र मानन्धर धाःसा डान्स टिचरया रुपय् ज्या याना वयाच्वंगु दुसा अन्नपुर्णेश्वरी श्रेष्ठया छुं ई न्ह्यव तिनि खँय् भाय्या छगू फिल्म “प्रसाद” पिहां वःगु दु । “राजमति” फिल्मया हिरोइन कथं म्हसीका दुम्ह हिसिला महर्जनया न्हूगु फिल्म वइगु छुं खँ मदुनि ।
“बसन्त ऋतु”या देन
“बसन्त ऋतु” फिल्मं डेब्यू याःपिं मध्ये दकलय् बय्बय् जूपिं धइपिं अनु महर्जन व शोभा महर्जन खः । उकी मध्ये अनु महर्जन आः हाकनं पवन जोशीं हे दयेकेत्यंगु न्हूगु फिल्मय् नं म्हितीगु चर्चा दुसा शोभा महर्जन थःगु लजगाः फेशन डिजाइन व फेशन इभेण्टया ज्याय् हे व्यस्त जुयाच्वंगु खनेदु । छुं ई न्ह्यःतिनि शोभां नेपाली खस फिल्मया हिरो सरोज खनाललिसे नं छगू म्युजिक भिडियो म्हितूगु दु । नेवाः युट्युबय् पिहां वःगु “स्वन्हु” नांयागु शर्ट फिल्मय् नं खनेदयेकः वःगु दु । थ्व हे फिल्मय् म्हितूम्ह सोनिका हेक्का नं “लिच्वः” नांयागु शर्ट फिल्मय् म्हितूगु बाहेक मेगुलिइ खनेमदुनि ।
मेमेपिं
थ्व हे “स्वन्हु” नांयागु शर्ट फिल्मय् नं खनेदयेक वःम्ह हिरो रणेन्द्र महर्जनया डेब्यू फिल्म धइगु “स्वय्नगु” खः । थ्व फिल्मय् मेन रोल म्हिता नेवाः फिल्मय् दुहां वःम्ह रणेन्द्र महर्जनं आःतक मेगु फिल्म म्हितूगु खनेमदुनि । अथे हे तुं “स्वय्नगु” फिल्मया हिरोइन सुशीला तण्डुकारया नं मेगु फिल्मया बारे खँ न्यने मदुनि । “तिनतिकः महाबिकः” पाखें दुहां वःपिं मध्ये योगेन ज्यापु “हिसिमति” फिल्मय् हाकनं छक्वः निकी महर्जनलिसे हे हिरो जुयाः खनेदयेकः वयेत्यंगु दुसा विशेष यानाः हुलाप्याखनय् ल्हाः ज्वःम्ह अनुज डंगोल धाःसा “हिसिमति” फिल्मय् पूर्णकाजी ज्यापुलिसे मंकाः निर्देशकया रुपय् खनेदयेकः वयेत्यंगु दु । अथेहे तुं “मू मदुगु जिन्दगी” फिल्मं डेब्यु याःम्ह हिरो आर एल महर्जन आः हाकनं छक्वः नेवाः फिल्मय् खनेदयेकः वयेत्यंगु दु ।
‘मिजं’ लगायतया फिल्मय् म्हितूम्ह सुरेन्द्र महर्जनं धाःसा “थः कतः कतःथः” व “माया” म्हितलसा थौंकन्हय् बलिउड धकाः धयातःगु हिन्दी फिल्मया महासागरय् थःगु पलाः थातय् लाकेगु कुतः यानाच्वंगु दु । नेवाः कलाकारिता ख्यलय् छम्ह व्यस्तम्ह हुलाप्याखंमिया रुपय् बय्बय् जुयाच्वंम्ह आराध्यलक्ष्मी खड्गीया डेब्यू फिल्मया रुपय् बय्बय् जुयाच्वंगु “लिबाय् धुंकाः” फिल्मय् हाकनं खनेदयेक वयेत्यंम्ह हिरो आर एल महर्जनं थ्व हे दथुइ “एक पल” नांयागु खस नेपाली फिल्मय् हिरो जुयाः म्हितल । अथे हे खस नेपाली म्हितूम्ह मेम्ह हिरो सोहित मानन्धर नं “मू मदुगु जिन्दगी” फिल्मं हे नेवाः फिल्मय् दुहां वःम्ह खःसा आः सोहित भाजु “लाखेभाजु” फिल्मय् खनेदयेकः वयेत्यंगु दु । “पटाचारा” व “कृषा गौतमी” फिल्मय् हिरो जुयाः म्हितूम्ह कर्मा धाःसा कलिउड धकाः धयातःगु खस नेपाली फिल्म ख्यःया हे छम्ह लोकंह्वाःम्ह हिरो खः । वय्कःभाजुया न्हूगु खस नेपाली फिल्म “गरुड पुराण” नकतिनि हे पिहां वःगु दुसा आः रामकृष्ण खड्गी भाजुं हे दयेकेत्यंगु न्हूगु फिल्मय् नं खनेदइगु आशा आपाःसिनं याना वयाच्वंगु दु ।
LEAVE YOUR COMMENTS