श्यामसुन्दर सयँजुया हाइकु किचः विमोचन

येँ (नेपालभाषा टाइम्स)÷ वंगु शनिवाः अन्तराष्ट्रिय हाइकु दिवसया लसताय् महान्यायाधिवक्ता कार्यालयया गौतम बुद्ध सभाकक्ष भवन, सिंहदरवारय् जूगु छगू समारोहस पुलांम्ह प्रधानन्यायाधिश कल्याण श्रेष्ठं हाइजिन श्यामसुन्दर सयँजुया हाइकु मुना सफू ‘हाइकु किचः’ विमोचन यानादिल ।

ज्याझ्वलय् न्ववानादिसें मूपाहां भाजु  श्रेष्ठं म्हो शब्द, गहन बिषय, गहन सम्प्रेशन, गहन चेतनायात सशक्त रुपं न्ह्यब्वयेगु माध्यम हाइकु जूगु धयादिसें थःत नं हाइकुं सालाकाःगु खँ धयादिल ।

नेवाः हाइकु ख्यःया नायः सुरेश प्रधानया ज्याझ्वःया सभापतित्व यासें नेपालय् हाइकु च्वयेगु ज्या न्ह्याःगु ई (ने.सं. १०७९, (२०१६ सालं) लं निसें हे हाइकु च्वया वयाच्वनादीम्ह भाजु श्यामसुन्दर सयँजुया हाइकुत पाण्डुलिपिइ जक लिकुनाच्वंगु खँ न्ह्यथँसें थुपिं पाण्डुलिपित सफूया रुपय् पितबिइमाःगु थौंया आवश्यकतायात नेवाः हाइकु ख्यलं महसुस यानाः थ्व ज्या न्ह्याकागु खः धयादिल ।

वय्कलं सयँजुया हाइकुइ थम्हं न्हियान्हिथंया जीवनय् खंगु व अनुभव यानागु बिषय, घटना, उकिया दथुइ दुगु अन्तरविरोध, संघर्ष, विडम्बना आदियात थीथीकथं विश्लेषण यानाः, चिन्तन यानाः अभिव्यक्त यानातःगु खँ न्ह्यथनादिल ।

ज्याझ्वलय् वरिष्ठ कवि, समालोचक डा. आनन्द जोशीं कवि सयँजु नेपालभाषाया आधुनिक गद्य कविताया छम्ह न्ह्यलुवाः कवि जूगु खँ न्ह्यथँसेंं वय्कःया हाइकुं नेपालभाषाय् न्ह्यानाच्वंगु परम्परागत हाइकु व आधुनिक हाइकुया दथुइ च्वनाः ताँया भूमिका निर्वाह याःगु खँ कनादिल ।

अथेहे सपूmया प्रकाशक वरिष्ठ अधिवक्ता श्यामसुन्दर सयँजुया तःधिकःम्ह म्ह्याय् मय्जु अमितालक्ष्मी सय्ँजु श्रेष्ठं लिबाक्क हे जूसां थः अबुया कृतियात पिथने दुगुलिं थःपिनि सकल जः तसकं लय्तायाच्वनागु दु धयादिल । थः अबु श्यामसुन्दर सयँजुया वहुआयामिक व्यक्तित्वया थीथी पक्षयात दुवालादिसे वय्कलं थः अबुं च्वयाथकादीगु रबिन्द्रनाथ टैगोरया अनुवाद ‘गितान्जलि’ व खस् नेपाली भाषाय् च्वयादीगु ‘चस्काहरु घाउका’ धयागु कविता सपूm नं याकनं प्रकाशनय् हयेगु खँ कनादिल ।

नेवाः हाइकु ख्यःया ग्वसालय् जूगु उगु ज्याझ्वः धर्मकृष्ण सिकःमिं न्ह्याकादीगु खः । ज्याझ्वलय् साहित्यकार मोहन दुवाल, साहित्यकार डा. सुमन ताम्राकार, हाइजिन लिसें नेवाः हाइकु ख्यःया न्वकू भाजु तुयुपुं नं  कवि श्यामसुन्दर व वय्कःया हाइकुया थीथी पक्षयात कयाः थःगु नुगः खँ प्वंकादीगु खः ।