नेपालभाषा टाइम्सयात महानगरीय सुशासन पत्रकारिता सिरपाः

येँ – ‘नेपालभाषा टाइम्स’ न्हिपौयात येँ महानगरपालिकां बीगु महानगरीय सुशासन पत्रकारिता सिरपाः लःल्हाःगु दु । येँ महानगरपालिकाया २६ क्वःगु महानगर दिवसया लसताय् जूगु छगू ज्याझ्वःया दथुइ थौं थ्व सिरपाः लःल्हाःगु खः । थ्व दसिपौ व न्यय्द्वः तकाया दां सिरपाः खः ।

येँ महानगरपालिकां महानगर दिवसय् लाकाः दँय्दसं झिम्हेसित बिया वयाच्वंगु थ्व सिरपालय् थुगुसी नेपालभाषा पाखे नेपालभाषा टाइम्स न्हिपौया च्वमि व वरिष्ठ पत्रकार विजयरत्न असंबरे व लहना वाःपौया प्रबन्धक सुरेन्द्र भक्त श्रेष्ठयात नं लःल्हाःगु खः ।

राष्ट्रिय सभागृहय् सोमवाः जूगु छगू ज्याझ्वःया दथुइ येँ महानगरपालिकाया मेयर विद्यासुन्दर शाक्यं थ्व सिरपाः लःल्हानादीगु खः । ज्याझ्वलय् येँ महानगरपालिकाया उत्कृष्ट जनप्रतिनिधि, कर्मचारीपिंत नं थीथी सिरपाः लःल्हाःगु खःसा येँया १७३ गू थीथी बाजं खलःया बाजंगुरुपिंत नं म्हतिं स्वीद्वः स्वीद्वः दां सिरपाः सहित हनेज्या याःगु खः । थुगुसी निसें येँ मनपां येँया न्हापांम्ह जननिर्वाचित सभापति स्व. जनकमान श्रेष्ठया नामं बीगु सुरु याःगु छगूलाख तका सहितया ‘जनकमान श्रेष्ठ स्वशासन पुरस्कार’ येँ मनपा १८ वडाया पुलांम्ह वडाध्यक्ष चन्द्रानन्द नेवाः लिसें मेपिं स्वम्हेसित बिउगु खः ।

अथेहे थुगुसी निसें सुरु याःगु ‘मेयर्स सिरपाः’ ज्यापु महागुथि येँ महानगर कचायात बिउगु दु । थ्व नं छगू लाख तकाया सिरपाः खः । अथेहे स्थानीय सेवा गौरव पदकपाखें न्याम्ह जनप्रतिनिधि व न्याम्ह कर्मचारीयात सम्मानित याःगु दु । छगू लाख तका व छतोला लुँ व छतोला वह ल्वाकछ्यानाः दयेकातःगु पदक सहितया थ्व सम्मान जनप्रतिनिधि पाखे येँ मनपा १ वडाया अध्यक्ष भरतलाल श्रेष्ठ, ३ वडाया अध्यक्ष दीपक केसी, १९ वडाया अध्यक्ष शशीलाल श्रेष्ठ, २७ वडाया अध्यक्ष चिनियाँमान वज्राचार्य व ३० वडाया अध्यक्ष दलबहादुर कार्कीयात लःल्हाःगु खः ।

ज्याझ्वलय् न्ववासें मेयर शाक्यं येँ महानगरपालिका संघीय राजधानीइ लाःगु पालिका जूगुलिं थन वयाच्वंपिं सकसितं ध्यानय् तयाः महानगरपालिकां ज्या यानाच्वंगु खँ धयादिल । वय्कलं स्वनिगलय् वइपिं ७७ जिल्लाया वासिन्दातय् स्वास्थ्य उपचार स्वइगु अस्पतालतय्त महानगरपालिकां थीथी कथं ग्वाहालि याना वयाच्वंगु खँ धयादिल । महानगर दिवसया हे झ्वलय् मेयर शाक्यं ‘मृगौला बचाउ अभियान’या घोषणा नं यानादीगु खः । अथेहे ज्याझ्वलय् मूपाहाँ संसदीय व्यवस्था व सामान्य प्रशासन मन्त्री हृदयश त्रिपाठी, विशेष पाहाँ शहरी विकास राज्यमन्त्री रामवीर मानन्धर लिसें मेयर शाक्यं येँयाः बारे अनुसन्धात्मक सफू ‘इन्द्रजात्रा’या विमोचन नं यानादीगु खः ।