ने. सं. ११४४ कौलाथ्व षष्ठी -

बुलुया चन्द्रभैरव जात्रा नं स्थगित

येँ (रासस) –कोरोना भाइरसया सम्भावित जोखिम न्यंके मबिइत लकडाउन जुयाच्वंगुलिं बुलुगामय् जुइगु नांजाःगु चन्द्रभैरव जात्रा नं स्थगित जूगु दु । दँय्दसं चैतया एकादशि निसें त्रयोदशीतक स्वन्हुयंकं गोदावरी नगरपालिकाया चापागाउँ बुलुइ थ्व जात्रा जुइगु खः ।

थुगुसी जात्रा मजुइगु जुइवं द्यःपाःलाःपिंत पराम्परागत रुपं द्यः जक पुज्यायेत इनाप यानाच्वंगु खँ वडाध्यक्ष नीलबहादुर देशारं कनादीगु दु ।
स्थानीय७४ दँया बासुदेव कर्माचार्यं धाःकथं चापागाउँ स्थापना जुइ न्ह्यः हे बुलुगां दुगु खः । बुलुगांयात शिवपुर नं धाइगु खः । महामञ्जुश्रीं सन्तानेश्वर महादेवया सीमाना, बाडेगांया दथुइ पहाड व चोभारया पहाडयात तान्त्रिक तरवारं पालाः दहया लः पिकागु धयागु किंवदन्ती थन दु । थ्व दह सुके जुइ न्ह्यः हे नागराजयात तयेमाः धयागु ल्याखं नागयात तःगुलिं उगु थाय्या नां नागदह जूवन । गुगु धापाखेलय् दु ।

लः सुके जुइधुंकाः दक्षिण भेगया छगू गां माः धकाः उगु गांया नां शिवपुर धकाः तःगु खः । लः सुके जुइधुंकाः थुगु थासय् पशुपति महाद्यः उत्पत्ति जूगु धयागु किंवदन्ती नं दु । बुलुगांया पूर्वपाखे महाद्यः नं दु ।

बुलुगांया छम्ह मनुखं बदमासी याःगुलिं वयागु ख्वाः स्वयेमखु सकसिनं उगु थाय् त्वःता वंगुलिं महाद्यः नं थनं पशुपतिइ वंगु किंवदन्ती दुगु खँ नं कर्माचार्यं कनादिल । बुलुगामं महाद्यः व स्थानीय मनूत दनावंगुलिं गांया शून्य जुयाः ग्यानापुया वल । थुकिया तःदँ लिपा गामय् च्वंगु फुक्क छेँ दुनावन । उबलय् अन छगू परिवार जक च्वनाच्वंगु जुयाच्वन । गांया खिउँसे च्वनाः बुलुया वंगुुलिं उकियात शिवपुर बुलुसिच्व अर्थात बुलु धकाः नां तःगु खः ।

बुलुगामय् आतकं छु नं शिलापत्र मलूनिगुलिं थ्व जात्रा गुबलय् सुनां न्यायेकूगु धयागु सीमदुनिगु खँ धाःगु दु । बुलुगांया छगू अजूचायापुगु शक्ति नं दु धाइ । थ्व गामय् च्वंगु छुं नं पुलांगु सामान पिने मेथाय् यंकल धायेवं बांमलाक सः तायेदयावइ । उकिं थथे बांमलाक सः बी धयागु सिउपिं मनूतय्सं थनं छुं नं पुलांगु सामान पिने यंकीमखु धाइ । थनया गांया सामान पिने गामय् यंकलकि चछि द्यने फइमखु धयागु बुलुवासीतय् धापू अझं दनि ।