ने. सं. ११४४ कौलाथ्व दुतिया -

कविरत्न सिद्धिचरण श्रेष्ठया ११३ क्वःगु बुन्हि हन

येँ (नेपालभाषा टाइम्स)- खय्भाय्या नापनापं नेपालभाषा साहित्य ख्यलय् ज्वःमदुगु योगदान यानादीम्ह कविरत्न सिद्धिचरण श्रेष्ठया ११३ क्वःगु बुन्हि हनेज्या जूम प्रविधि पाखें हलिं नेवाः दबूया ग्वसालय् तछलाथ्व पञ्चमी कुन्हु जुल । हलिं नेवाः दबूया केन्द्रीय नायः संयुक्त श्रेष्ठं कविरत्नया किपाया न्ह्यःने न्हूप्रविधि कथं मत च्याकाः उलेज्या यानाः लसकुस न्वचु बियाः न्ह्याकूगु थुगु ज्याझ्वलय् संगीतकःमि रिता महर्जनं सिद्धिचरणं च्वयादीगु ‘जिगु देय् छ जितः गुलि यः गुलि यः’ नांगु म्ये हालाः न्यंकादीगु खः ।

ज्याझ्वःया मूवक्ता प्रा. पे्रमशान्ति तुलाधरं कविरत्न सिद्धिचरणं नेपालभाषा साहित्यय् यानादीगु योगदान बिषयय् ग्यसुग्यंगु ज्यापौ न्ह्यब्वयादीगु खः । वय्कलं सिद्धिचरण श्रेष्ठं खय्भाय्या नापनापं नेपालभाषा साहित्यय् तःजिगु योगदान यानादीगु खँ न्ह्यथँसे सिद्धिचरण नेपालय् स्वछन्दवाद साहित्यया प्रवर्तक खः धयादिल । थुकथं हे ज्याझ्वलय् कवि भगतदास श्रेष्ठ, कवयित्रि प्रतिसरा साय्मि, कवि नारद वज्राचार्य, कवियत्री रश्मी नापित व लोककवि राजभाइ जकःमिपिंसं सिद्धिचरणया बारे व सिद्धिचरणं च्वयातःगु चिनाखँ न्यंकादीगु खः ।

सिद्धिचरणया काय् समाजसेवी रविचरण श्रेष्ठं कविरत्नं नेपालय् दकलय् न्हापां व्रmान्ति, हडताल, घःमाः खँग्वः प्रयोग यानादीगु खँ न्ह्यथँसे सिद्धिचरणया कविताया प्रेरणा कयाः गंगालाल श्रेष्ठ शहीद तक जुयादीगु प्रसंग न्ह्यथनादिल । हलिं नेवाः दबूया मूदुजः विरेन्द्र नकःमिं सुभाय् न्वचु बियादीगु थुगु ज्याझ्वः हलिं नेवाः दबूया मूदुजः नापं डब्लू.डि.बि.या कजि डा. नरेश शाक्यं न्ह्याकादीगु खः ।