कोभिडया इलय् शताब्दीपुरुषया न्हय्गू सफू

येँ (नेपालभाषा टाइम्स) – वाङ्मय शताब्दी पुरुष सत्यमोहन जोशीं कोरोना भाइरसया महामारीया इलय् झीगु संस्कृति, जात्रापर्व संयमित जुयाः हनेमागु खँ धयादीगु दु । ‘थज्याःगु महामारीयात हल्काकथं कायमजिउ । करं यायेमाःगु जात्रापर्वत विधि पूवंका ‘सर्टकटं’ क्वचायेकेमा । थुगुसिया कात्तिक प्याखं निन्हु जक मञ्चन यानाः सिधयेकल, थ्व तसकं बांलागु दसु खः’, शताब्दीपुरुष जोशीं धयादिल ।

नेवाः पत्रकार राष्ट्रिय दबू कोभिड १९ सचेतना कमिटीं न्ह्याका वयाच्वंगु फेसबुक लाइभ ज्याझ्वःया २५ ब्वः थ्यंगु लसताय् शनिवाः शताब्दी पुरुष सत्यमोहन जोशीनाप यानादीगु खँल्हाबल्हाया झ्वलय् वय्कलं थ्व खँ धयादीगु खः । हलिंयात आक्रान्त याःगु कोरोना भाइरसया संक्रमण तब्याना वंगुलिं नेवाः पत्रकार राष्ट्रिय दबूपाखें थ्व महामारीबारे सर्वसाधारणतय्त सूचं बीगु लिसें सचेत यायेत प्रजित शाक्यया संयोजकत्वय् कोभिड १९ सचेतना कवः गठन जूगु खः । थ्व कमिटीया दुजलय् रचना श्रेष्ठ, मिना वज्राचार्य, तेजनाराण महर्जन, अनुप प्रधान व हसना लवजू दु ।

शताब्दी पुरुष जोशीं थः नं कोभिड १९ महामारीया इलय् छेँ नं पिहां मवनागु खँ न्ह्यथँसें थ्व ईया सुदपयोग यानाः अङ्ग्रेजी भाषं निगू व मेगु न्यागू सफू तयार यानागु जानकारी नं बियादीगु खः । ‘यल महानगरपालिकां जिगु सछिदँ बुन्हि हनेगु झ्वलय् जिगु नामं २५००, १००० र १०० तकाया सिक्का पिकाल, अथेहे झितका वंगु हुलाक टिकट पिकायेगु कुतः यानाच्वंगु दु । थुकीया पलेसा पुलेकथं यलया थीथी विषयय् न्यागू सफूतयार यानागु खः । थ्व सफू यल महानगरपलिकापाखें पिकायेगु तयारी जुयाच्वंगु दु’ वयकलं धयादिल ।

संस्कृतिविद् जोशी थःम्हं तयार यानागु ‘ललितपुर ए सिटी अफ डान्स, ड्रामा एन्ड म्युजिकु सफूयात कयाः यक्व उत्साहित जुयाच्वनादीगु दु । शताब्दीपुरुष जोशीया कथं थ्व सफूपाखें यलया इतिहासबारे यक्व खँ सिइकाकायेफइ ।

खँल्हाबल्हाया झ्वलय् नेवाःतय्सं थःगु मांभासं खल्हायेगु म्हो जुयावंगु खँय् नं शताब्दीपुरुष जोशीं चिन्ता प्वंकादिल । ‘नेवाः भाय् न्ववायेगु निरन्तर जुइमाल । सच्छिमध्ये स्वीन्याम्ह नेवाःतय्सं नेवाः भाय् नमवाये धुंकल । थः मस्तय्त ‘बेसिक’ खँ सां स्यनेमाल । झीगु नखःचखः, जात्रापर्व बारे ज्ञान बिमाल । मखुसा झीगु भाषा नं संस्कृत व पालि भाषा थें मृतभाषा जूवनी’ वय्कःया धापू दु ।

अथेहे नेपाःया तथ्याङ्कविद्या कथं नं म्हसिका दुम्ह जोशीं २०७८ सालया जनगणनाय् यथार्थ विवरणया लागि झी नेवाःत थः हे सचेत जुइमाःगु खँ नं धयादीगु दु ।

नेवाः पत्रकार राष्ट्रिय दबूया नायः सुरजवीर वज्राचार्यं कोभिड १९ सचेतना कवलं न्ह्याका वयाच्वंगु ज्याझ्वःया २५ ब्वः थ्यंगु छगू ‘माइलस्टोन’ खः धासें थुकिया निरन्तरताया कामना यानादिल ।

सम्बन्धित बुखँ

LEAVE YOUR COMMENTS