एन्फाय् पदाधिकारी नियुक्त

येँ – अखिल नेपाल फुटबल संघ (एन्फां) कार्यसमितिइ थीथी पदाधिकारी नियुक्त याःगु दु । एन्फाया न्हूगु निर्वाचित कार्यसमितिया न्हापांगु बैठकं कार्यसमितिइ थीथी पदाधिकारी नियुक्तलिसें थीथी उपसमितिया जिम्मेवारी नं बिउगु खः ।
नवनिर्वाचित कार्यसमितिया न्हापांगु बैठकं एन्फाया महासचिवय् इन्द्रमान तुलाधर व कोषाध्यक्षय् रवीन्द्र जोशीयात नियुक्त याःगु खः ।

तुलाधर थ्व स्वयां न्ह्यः एन्फाया प्रमुख कार्यकारी अधिकृत व जोशी सहकोषाध्यक्ष खः । थुकथं हे उगु बैठकं टासी घलेयात एन्फाया मानार्थ अध्भ्यक्ष, किशोर राईयात वरिष्ठ मानार्थ उपाध्यक्ष शिक्षित पराजुली मानार्थ उपाध्यक्ष नापं आर्थिक समितिया संयोजक व नवीन पाण्डेयात अन्तर्राष्ट्रिय प्रमुखलिसें सल्लाहकार समितिया संयोजकया जिम्मेवारी बिउगु दु ।

अथे हे कार्यसमितिया सदस्यय् निर्वाचित किरण राईयात एन्फाया प्रवक्ताया जिम्मेवारी बिउगु दुसा लेखा परीक्षण व अनुशासन समितिया संयोजकया जिम्मेवारी दीपक खातीयात बिउगु दु । थ्व हे झ्वलय् एन्फाया उगु बैठकं १८ दँ क्वय्या ललित स्मृति फुटबल कासा यायेगु नापं थीथी निर्णय याःगु दु ।

उगु फुटबल कासा जेठ २९ गतेनिसें यायेगु नापं एन्फाय् आवद्ध जुयाच्वंगु जिल्ला फुटबल संघया सहभागिताय् जिल्ला लिग, प्रादेशिक कासा, केन्द्रीय कासा कथं एन्फा प्रेसिडेन्ट कप फुटबल लगायतया कासा संचालन यायेगु निर्णय नं याःगु दु ।