लुम्बिनीया विहार, गुम्बाय् व्यावसायीय ज्या मयायेत निर्देशन
येँ (रासस)- लुम्बिनी विकास कोषं लुम्बिनी गुरुयोजना दुने लाःगु गुम्बा व विहारय् व्यावसायिक गतिविधि मयायेत निर्देशन बिउगु दु । कोषं लुम्बिनीया विहारयात विहारक्षेत्र नियमावली २०५८ कथं अन च्वनीपिं विदेशी नागरिकतय् विवरण लःल्हायेत नं निर्देशन बिउगु दु ।
लुम्बिनी विकास कोषया क्षेत्राधिकारया विहार क्षेत्र भगवान बुद्धया शिक्षा व उपदेशया पूर्ण रुपं पालना यायेमाmगु थाय् जूगु न्ह्यथँसें विहार क्षेत्रयात बौद्ध धार्मिक, आध्यात्मिक व शान्ति क्षेत्रया रुपय् स्थापित यायेत नं इनाप यासें कोषं पौ छ्वःगु खः ।
विहारय् वइपिं विदेशी व उपिं लिहां वनीगु तिथि न्ह्यथनाः विवरण नियमित रुपं कोषय् छ्वयाहयेत नं धाःगु दु । लिसें कोषं विहार क्षेत्रय् व्यावसायिक प्रयोजनया छुं नं ज्या मयायेत नं इनाप याःगु दु । व्यावसायिक गतिविधि याःगु खनेदत धाःसा कारवाही जुइगु ख्याच्वः नं बिउगु दु ।
लुम्बिनी गुरुयोजना क्षेत्रयात बौद्ध धार्मिक, अध्यात्मिक व शान्तिया केन्द्रया रुपय् विहास यायेत लुम्बिनी गुरुयोजना क्षेत्र दुनेया विहार क्षेत्रयात चीधंगु बौद्ध संसार कथं परिकल्पना यानाः अन थीथी देय् व बौद्ध सम्प्रदाययात विहार दयेकेत जग्गा बिउगु कथं बौद्ध विहार, गुम्बा, ध्यान केन्द्र दयेकाः संचालन जुया वयाच्वंगु दु ।
गुम्बा व विहारय् न्याम्ह भिक्षु भिक्षुणी व उमि ग्वाहालिमि कथं थप न्याम्ह यानाः झिम्ह जक विदेशी नागरिक च्वनेगु व्यवस्था दुगु नं लुमंकाबिउगु दु ।
लुम्बिनी विहार व गुम्बाय् बौद्ध आध्यात्मिकता व बौद्ध भावनाया विकास यायेमाःगुलि उकिया अःखः होटेल थें क्वथा तयार यानाः पर्यटकतय्त तःगु खँय् आपत्ति प्वंकुसें लुम्बिनी होटल संघं वंगु फागुन २९ गते कोषयात ज्ञापनपत्र लःल्हाःगु खः ।
LEAVE YOUR COMMENTS