पेट्रोल मीपिं डिपोतय् हडताल

येँ – पेट्रोलियम पदार्थ मिउगु बापत पेट्रोल पम्पयात बीगु कमिसन थमकाः धासें पेट्रोलियम व्यवसायीतय्सं म्हिगःनिसें पेट्रोलियम डिपों पेट्रोलियम पदार्थ ढुवानी यायेगु ज्या बन्द याःगु दु । नेपाल आयल निगमं वंगु बिहीवाः चान्हय्निसें पेट्रोलियम पदार्थया भाः थकाःगु खःसा बिक्रेताया कमिसन धाःसा न्हापाया तुं कायम यायेवं म्हिगः देय्न्यंकं हे पेट्रोलियम पादर्थ ढुवानी बन्द जूगु खः ।

व्यवसायीपिंसं अत्यावश्यक वस्तुया रुपय् दुगु पेट्रोलियम पदार्थ ढुवानी बन्द यायेवं थीथी पेट्रोल पम्पय् पेट्रोलियम पदार्थया नितिं लाइन च्वनीपिं नं अप्वया वनाच्वंगु दु ।

म्हिगः सेना, प्रहरी, सशस्त्र प्रहरी व साझा पेट्रोल पम्पं जक पेट्रोलियम पदार्थ लोड याःगु खः । थानकोटया डिपोय् निजी पम्पया ट्यांकर वःसां नं पेट्रोलियम पदार्थ लोड मयाःगु खँ थानकोट डिपोया प्रमुख शैलेन्द्र भुसालं कनादीगु दु ।

नेपाल आयल निगमया कथं डिपोवालातय्त प्रतिलिटर ३.१४ तका कमिसन बिया वयाच्वंगु खःसा बिहीवाः चान्हय्निसे थहां वंगु भाः कथं व्यवसायीयात थप ०.१५ पैसा अप्वः कमिसन बीमाःगु खः । तर अन्तर्राष्ट्रिय बजारय् कच्चा पेट्रोलियम पदार्थया भाः न्हिथं थहां वनाच्वंगुलिं निगमया सञ्चालक समितिं बिक्रेतायात बियाच्वंगु कमिसन वंगु फागुन ७ गते कायम जूगुयात हे निरन्तरता बीवं उकिया विरोधय् नेपाल पेट्रोलियम डिलर्स राष्ट्रिय एसोसिएसनं डिपों इन्धन कायेगु ज्या दिकूगु खः ।

निगमं पेट्रोलियम पदार्थया ढुवानी दिकेगु ज्या गैरजिम्मेवारी खः धासें थज्याःगु अवस्थाय् निगमयात धिसिलाकेगु लागिं फुकसिया ग्वाहालि आवश्यक जूगु खँ धाःगु दु । निगमं थः कर्मचारीया पोशाक खर्च तकं कटौती यानाच्वनागु इलय् व्यवसायीत जिम्मेवारी मजूगु द्वपं नं बिउगु

दु ।
व्यवसायीतय्सं पेट्रोलियम पदार्थ ढुवानी मयात धाःसा निगमं मेगु विकल्प नालाः जूसां नं ढुवानी सहज यायेगु खँ धाःगु दु ।

सम्बन्धित बुखँ

LEAVE YOUR COMMENTS