सशस्त्रया संस्थापक महानिरीक्षकया १६ क्वःगु स्मृति दिवस

येँ – कृष्णमोहन–नुडुप प्रतिष्ठानं सशस्त्र प्रहरी बलया संस्थापक महानिरीक्षक कृष्णमोहन श्रेष्ठ व वय्कःया जहान नुडुप श्रेष्ठयात लुमंकूगु दु । सशस्त्र प्रहरी बलया न्हापांम्ह महानिरीक्षक श्रेष्ठ व वय्कःया जहान नुडुपया झिंखुक्वःगु स्मृति दिवस ज्याझ्वलय् वय्कःपिंप्रति श्रद्धाञ्जली देछासे बलया न्हापांम्ह महानिरीक्षक श्रेष्ठया योगदानयात कयाः चर्चा याःगु खः ।

ज्याझ्वलय् प्रहरी महानिरीक्षक सर्वेन्द्र खनालं देय् व जनतायात न्ह्याबलें नं केन्द्र विन्दुइ तयाः नेपाल प्रहरी व सशस्त्र निगुलिं सुरक्षा निकायं सतीगु स्वापू कायम याना तयेगु ज्याय् मदुम्ह श्रेष्ठं म्हितादीगु भूमिका, वय्कःया योगदान न्ह्याबलें नं प्रेरणादायी, अविष्मरणीय जुयाच्वनी धयादिल ।

उगु इलय् प्रहरी महानिरीक्षक खनालं म्हतिं न्हय्द्वः तका दांया ‘कृष्णमोहन–नुडुप कार्यदक्षता पुरस्कार’ सशस्त्रया प्रहरी सहायक निरीक्षक थमानसिंह राई व नेपाल प्रहरीया प्रहरी सहायक निरीक्षक विनिता थापामगरयात व ‘सूर्य रेग्मी उत्कृष्ट अंगरक्षक पुरस्कार’ सशस्त्रया प्रहरी सहायक निरीक्षक गोविन्द सुवेदी नापं निम्हेसित कृष्णमोहन–नुडुप छात्रवृत्ति नं लःल्हानादिल ।