पद्मरत्नया निबन्ध प्रज्ञा प्रतिष्ठानं पिथनीगु

येँ – नेवाः न्ह्यलुवा पद्म रत्न तुलाधरं च्वयादीगु साहित्यिक रचनात नेपाल प्रज्ञा प्रतिष्ठानं खस नेपाली भासं अनुवाद यानाः प्रकाशित याइगु जूगु दु । शुक्रवाः येँय् जूगु छगू ज्याझ्वलय् न्ववासें प्रतिष्ठानया कुलपति गंगाप्रसाद उप्रेतिं थ्व खँ कनादीगु खः । तुलाधरया व्यंग्य चेतं जाःगु निबन्धत न्हापां खस नेपाली भासं अनुवाद यानाः प्रकाशन यायेगु व वयां लिपा पाय्छि जुल धाःसा अन्दरदेशीय अनुवाद कार्यक्रम अन्तर्गत दक्षिण एशियाया मेमेगु भासं नं अनुवाद याना वनेगु खँ नं वय्कलं कनादिल ।

पारिजात स्मृति केन्द्रया ग्वसालय् शुक्रवाः पर्यटन बोर्डया हलय् जूगु ‘साहित्यमा पद्मरत्न’ ज्याझ्वलय् न्ववासें वय्कलं थ्व खँ कनादीगु खः । केन्द्रया नायः लिसें नांजाःम्ह गायक रायनया अध्यक्षताय् जूगु उगु ज्याझ्वलय् पद्मरत्न तुलाधरया साहित्य बारे मल्ल के. सुन्दर, डा. चुन्दा वज्राचार्य, रघुजी पन्त, स्नेह साय्मि लिसें तुलाधरया म्ह्याय्मय्जु सुम्निमा तुलाधरं नं न्ववानादीगु खःसा लोककवि राजभाई जकःमिं तुलाधर सम्बन्धी कविता वाचन यानादीगु खः ।