ने. सं. ११४४ कौलाथ्व पारू - नःलास्वनेगु

बुंगद्यःया रथय् न्हूगु घःचाः

येँ (नेपालभाषा टाइम्स)-यलय् तःजिक न्यायेकीगु बुंगद्यः व चाकबहाःद्यः लिसें येँय् न्यायेकीगु जनबहाःद्यः रथजात्राय् छ्यलीगु रथया घःचाः (पांग्रा) न्हूगु दयेकीगु जूगु दु । थुगुसी जुइगु निम्हं द्यःपिनि जात्राय् रथया घःचाः न्हूगु दयेकाः छुइत्यंगु खः । न्हूगु घःचाः दयेकेगु लागिं आवश्यक सिँ यलय् थ्यंकेधुंकूगु दुसा आः थ्वहे वइगु श्रीपञ्चमि कुन्हुंनिसें घःचाः दयेकेगु ज्या नं शुरु जुइगु खँ धाःगु दु ।

रथया घःचाः दयेकेगु झ्वलय् जनबहाःद्यःया लागिं उलि यक्व अनुष्ठान यानाच्वने म्वाःसां बुंगद्यः व चाकबहाःद्यःया रथया घःचाः दयेकेत धाःसा थीथी कथंया पुजाआजा यायेमाःगु खँ सीदुगु दु । घःचाः दयेकेत माःगु थ्व सिँ हये न्ह्यः हे अमलेखगंजया जंगलय् वनाः सिँया पुजा याःगु खः । वंगु वालय् बुंगद्यःया रथ दयेकादीम्ह दिल बाराही अमलेखगंज वनाः सिँया पुजा यानादीगु खः । थ्व पुजा यायेत निगू रथया च्याचाः घःचाःयात च्याम्ह हे फै बलि बीगु ज्या जूगु खः । छुं न्हि लिपा सिँ गाडीइ तयाः येँय् हःगु खः ।

आः श्रीपञ्चमि कुन्हु नं घःचाः दयेकेगु ज्या न्ह्याके न्ह्यः हानं च्याचाः घःचाःया लागिं च्याम्ह हे फै बलि बियाः पुजा याइतिनिगु खँ धाःगु दु । अमलेखगंजय् थ्व सिँया लागिं सिमा पाले न्ह्यः नं पुजा यानाः तिनि पालेगु ज्या जूगु खः । सिमा स्वयेत वंगु मोहनि न्ह्यः हे जंगलय् वनाः सिमा ल्ययेगु ज्या जूगु खःसा वयां लिपा पालेगु ज्या न्ह्याकूगु खः ।

सिमा पालेत नं विशेष पुजा जूगु खः । थ्व न्हूगु घःचाः दयेकाः रथय् छुइगु इलय् तक ६४ म्ह फै बलि बीमालीगु खँ नं धाःगु दु । बुंगद्यःया रथय् प्यचाः घःचाःयात प्यम्ह हे भैरवया प्रतीक माने याइगु जूगुलिं थुकी छचाः घःचाः स्यन धाःसा प्यचालं दयेकेमाःगु चलन दुगु खँ धाःगु दु । घःचाः दयेकेत माःगु खर्च गुथि संस्थानं चूलाकी ।

बुंगद्यःया रथ दयेकीबलय् उकी थीथी जातया सिँ छ्यलेगु यायेमाः । थुकी मध्ये घःचाःया लागिं बिस्कं कथंया सिँ छ्यलेगु याइ । घःचाःया लागिं सान्दानया सिमा माःगु खँ धाःगु दु । थ्व सिमाया सिँ तसकं प्यानुसे च्वनीसा थुकी यक्व रेसा–रेसा दइ । यक्व रेसा दइगु जुयाः थ्व सिँ दराज आदि फर्निचर दयेकेगु ज्याय् छ्यले फइ मखु । तर रथया घःचाः दयेकेत धाःसा तसकं ज्या वइगु खँ दिल बाराहीं कनादीगु दु ।

थ्व सिमा नं हानं मनूतय्सं पिनातःगु मजिउ । थ्व सिमा अथें प्राकृतिक प्रणालीपाखें बुया वःगु जुइमाः । थज्याःगु सिँ मात्तुमालाः वंबलय् अमलेखगंजय् लुया वःगु जुयाः अन हे पालाः हःगु खः । सिँ पालेत गुथि संस्थानया पहलय् मन्त्रिपरिषदया स्वीकृति कायेमाःगु खः ।