एमाले त्वःताः आः स्थापित गुखे ?

येँ (नेपालभाषा टाइम्स)- येँ महानगरपालिकाया पुलांम्ह मेयर केशव स्थापित नेकपा (एमाले) पाखें अलग्ग च्वनादीगु दु । पार्टीपाखें अलग च्वनागु खःसां थः एमाले हे मखयेधुंकूगु धाःसा मखुगु खँ वय्कलं कनादीगु दु ।

‘नेपालभाषा टाइम्स’ लिसे खँ ल्हासें वय्कलं धयादिल, ‘देशया लागिं माःगु पार्टी ला एमाले हे खः । भविष्य दुगु पार्टी नं एमाले हे खः । पार्टी न्ह्याकेगु लागिं सकलें दुने च्वनाः सालाच्वंगु दु । तर पार्टी न्ह्याकेत सालां जक मगाः । लिउने च्वनाः घ्वायेगु ज्या नं यायेमाः । आः घ्वायेगु लागिं ला गाडीं कुहां वये माल । जि वहे लिउने च्वनाः घ्वायेत जक गाडीं कुहां वयागु खः । गाडी घ्वायेबलय् तुति भचा ला ध्याचलय् लाइ । जि ध्याचलय् तुति लाकेत तयार दु । खँ उलि हे का ।’

स्थापितं आः थः छगू न्हूगु कथंया अभियानय् लगे जुइगु खँ नं कनादिल । तर छु अभियान धइगु खँ धाःसा शुरु जुल कि सकस्यां धासें आःयात सार्वजनिक मयाये धयादिल ।

लुमंकेबहः जू, वंगु छुं ई न्ह्यवंनिसें वय्कः गजिमा पीगु अभियानय् लगे जुयाच्वंगु दु । गजियात नगदे बालीया रुपय् उपयोग यानाः किसानतय्त लबः बीके फइ धइगु दावी वय्कलं याना वयाच्वंगु दु । वर्तमान सरकारं वंगु बजेटय् गजिमा पीगु बारे अध्ययन यायेगु धकाः नीति दयेकूगु खः ।