बजेटया निंतिं सुझाव संकलन जारी
किपू – किपू नगरपालिकां वइगु आर्थिक दँ २०७८÷०७९या निंतिं बजेट हयेत सुझाव कायेगु ज्या जारी हे यानाच्वंगु दु । नगरपालिकां वंगु जेठ २१ गतेनिसें हे वेबिनारपाखें वइगु आर्थिक दँया बजेटया निंतिं सुझाव संकलन याना वयाच्वंगु खः ।
किपू नगरपालिकां छगू सुचं हे जारी यानाः वइगु आर्थिक दँया बजेट निर्माणया निंतिं राय, सल्लाह, सुझाव बीत नगरवासीयात इनाप याःगु खः । नगरपालिकाया इनापकथं वेबिनारपाखें अप्वः यानाः शिक्षा व स्वास्थ्य ख्यःया निंतिं सुझावत वयाच्वंगु नगरपालिकां जानकारी बिउगु दु ।
नगरपालिकां कोरोना संक्रमणं ब्वलनाच्वंगु विषम परिस्थितिइ बजेटया निंतिं सुझाव संकलन यायेगु झ्वलय् दकलय् न्हापां जेठ २० गते थःपिनिगु वेबसाइटय् नां दर्ता यायेत इनाप यासें वेबिनारया धलः सार्वजनिक याःगु खः ।
नगरपालिकां सार्वजनिक याःगु धलःकथं जेठ २१ गते आर्थिक विकासया निंतिं कृषि, पशु, पर्यटन, सहकारी, राजस्व अभिवृद्धि, श्रोत परिचालन, जेठ २३ गते सामाजिक विकास अन्तर्गत शिक्षा, कासा, स्वास्थ्य व सम्बन्धित मेमेगु विषय, जेठ २४ गते पूर्वाधार विकास अन्तर्गत सतक, धः, त्वनेगु लः नापं वन व वातावरण विषय व जेठ २५ गते सुशासन व संस्थागत विकास नापं विपद् व्यवस्थापन व विविध विषय बियाः ज्याझ्वः याःगु खः ।
उकथं सुझाव संकलन याःगु इलय् कोरोनां यानाः ब्वलनाच्वंगु विषम परिस्थितिया इलय् थ्वलिसे सम्बन्धित नापं शिक्षा, ज्येष्ठ नागरिकया स्वास्थ्य, मिसा, मस्त, दलित व आर्थिक रुपं विपन्न वर्गया स्वास्थ्यया विषय दुथ्याकेत सुझाव वःगु नगरपालिकां न्ह्यथंगु दु ।
थुकथं हे कोरोना भाइरस (कोभिड–१९) विरुद्धया खोप अभियानयात दक्ष जनशक्ति प्रयोग यानाः परिचालन यायेमाःगु, सकसितं नगरवासी सकसितं खोप बीत नगरपालिकां आवश्यक समन्वयकारी भूमिका म्हितेमाःगु, अपांग जूपिंत शिक्षा व स्वास्थ्यया ख्यलय् विशेष ज्याझ्वः हयेमाःगु सुझाव नं प्राप्त जूगु नगरपालिकां जानकारी बिउगु दु । भौतिक पूर्वाधार, नगर दुनेया सांस्कृतिक महत्वया सम्पदा–संस्कृति संरक्षणया निंतिं नं ज्याझ्वः हयेमाःगु सुझाव नगरवासीं बिउगु दु ।
थुकथं प्राप्त राय, सल्लाह, सुझावयात वइगु आर्थिक दँया वार्षिक नीति तथा कार्यक्रम व बजेटय् दुथ्याकाः पारित यायेगु नगरपालिकां न्ह्यथंगु दु ।
LEAVE YOUR COMMENTS