ने. सं. ११४४ कौलाथ्व चौथी -

कांग्रेसं देय्न्यंकं प्रदर्शन याइगु

विधेयक पारित जुइवं आन्दोलन तीव्र

येँ – प्रतिनिधिसभां नकतिनि पारित याःगु चिकित्सा शिक्षा विधेयकया विरोधय् नेपाल विद्यार्थी संघं प्रदर्शन याःगु दु । म्हिगः न्हिनय् नेवि संघं माइतीघर मण्डलांनिसें नाराबाजी यासें न्हू बानेश्वर तक जुलुस पिकाःगु खः । नेवि संघं चिकित्सा शिक्षा विधेयक संसदं जबर्जस्ती पारित याःगु धासें उकिया विरोधय् प्रदर्शन याःगु खः ।

प्रदर्शनया झ्वलय् निषेधित क्षेत्र हाचां गाःगु धासें छुं विद्यार्थीतय्त प्रहरीं ज्वंगु दु । थ्व स्वयां न्ह्यः म्हिगः सुथय् नेवि संघं थीथी क्याम्पसय् प्रधानमन्त्री केपी शर्मा ओलीया पुत्ला च्याकेगु ज्या नं याःगु खः । शनिवाः बहनी विदेश भ्रमणय् लिहां वःम्ह प्रधानमन्त्री ओलीयात उमिसं लँय् च्वनाः हाकुगु ध्वाँय् नं क्यंगु खः ।

अथे हे विपक्षी पार्टी नेपाली कांग्रेसं नं विधेयकया विरोधय् थ्वहे वइगु माघ २१ गते देय्न्यंकं प्रदर्शन याइगु जूगु दु । मेखे नेपाल चिकित्सक संघं नं डा. गोविन्द केसीया जीवन रक्षाया माग यासें थनिनिसें रिले अनसन न्ह्याकीगु जूगु दु । आइतवाः येँया त्रिवि शिक्षण अस्पतालय् जूगु चिकित्सकतय्गु भेलां केसीया माग पूवंकाः वय्कःया जीवन रक्षा माग यासें रिले अनसन शुरु यायेगु निर्णय याःगु खः ।

डा. केसीया आमरण अनसन थौं झिंगुन्हु क्यंगु दु । वय्कःया स्वास्थ्य अवस्था उच्च जोखिमय् लाःगु खँ धाःगु दु । स्वनिगःया चिकित्सकतय्सं त्रिवि शिक्षण अस्पतालय् हे रिले अनसन यायेगु खँ चिकित्सक संघया अध्यक्ष डा. मुक्तिराम श्रेष्ठं कनादीगु दु ।

स्वनिगः पिनेया डाक्टरतय्सं धाःसा थः ज्या यानाच्वंगु अस्पताल वा संघया शाखा ज्याकुथी रिले अनसन च्वनीगु खँ धाःगु दु । थ्व स्वयां न्ह्यः चिकित्सक संघं सरकारयात केसीया माग पूवंकेत ७२ घौया अल्टिमेटम बिउगु खः ।

विधेयक संशोधन यायेत
आः राष्ट्रियसभायात दबाब

प्रतिनिधिसभां ‘जबर्जस्ती’ पारित याःगु चिकित्सा शिक्षा विधेयकयात आः राष्ट्रियसभां भिंकेमाःगु माग जुया वःगु दु । तर राष्ट्रियसभां उकियात भिंकी लाकि मभिंकी, अले भिंकूसां प्रतिनिधिसभां उकियात स्वीकार याइ लाकि याइ मखु धइगु न्ह्यसः धाःसा पिहां वःगु दु ।

सांसद रामनारायण विडारीं कनादीकथं राष्ट्रियसभां यदि थ्व विधेयकय् संशोधन या धकाः प्रतिनिधिसभाय् लित छ्वया हःगु अवस्थाय् प्रतिनिधिसभां उकियात स्वीकार याःसा अनं तुं पारित जुइ । छुं जुयाः प्रतिनिधिसभां स्वीकार मयात धाःसा उकियात निगुलिं संसदया संयुक्त वैठकय् यंकी, व संयुक्त बैठकया बहुमतं उकियात पारित याइ । थुकिया बारे राष्ट्रियसभां छु याइ धइगु निश्चित मजूनि ।