वाम गठबन्धनं मुख्यमन्त्री व सभामुख १४ गते जक क्वःछिइगु

येँ – वाम गठबन्धनं थःपिंसं सरकार दयेकीगु प्रदेशया मुख्यमन्त्री व सभामुखया नां कंस आइतवाः जक क्वःछिइगु जूगु दु । बिहिवाः च्वंगु वाम कार्यदलया बैठकं मुख्यमन्त्रीया व सभामुखया नां क्वःछिइगु धाःसां हाकनं दुग्यंक सहलह यानाः जक निर्णय यायेगु क्वःजिउगु खः । बिहिवाःया बैठकय् मुख्यमन्त्री व सभामुख जुइपिनि नां बारे सामान्य सहलह जक जूगु खँ कार्यदलया दुजः एमाले नेता सुरेन्द्र पाण्डें धयादीगु दु ।

बिहिवाःया बैठकय् थःपिंसं सरकार दयेकीगु सरकारय् मुक्कं सांसद संख्याया १० प्रतिशत जक मन्त्री तयेगु खँय् धाःसा एमाले व माओवादी केन्द्रया नेतातय् दथुइ सहमति जूगु दु । संविधान कथं सांसद ल्याःया २० प्रतिशत तक मन्त्री दयेके दइ, तर वाम गठबन्धनं आःयात १० प्रतिशत जक मन्त्री दयेकेगु सहमति याःगु खः ।

वाम गठबन्धनं प्रदेश नं. १, ३, ४, ५, ६ व ७ य् यानाः खुगू प्रदेशय् बहुमतया सरकार दयेकेफुगु स्थिति दु । बैठकय् प्रदेश १, ३, ४ व ५ य् एमालेया नेतृत्वय् सरकार दयेकेगु बारे थ्यंमथ्यं सहमति जुइधुंकूगु दु । आः प्रदेश नं. ६ व ७ य् जक एमालेया नेतृत्वय् वा माओवादी केन्द्रया नेतृत्वय् सरकार दयेकेगु धयागु बारे सहलह जुयाच्वंगु खँ धाःगु दु ।