१२ क्वःगु राष्ट्रिय बौद्ध सम्मेलन क्वचाल

येँ – धर्मोदय सभाया ग्वसालय् जूगु झिंनिक्वःगु राष्ट्रिय बौद्ध सम्मेलन तःजिक क्वचाल । धर्मोदयया ग्वसालय् थ्व हे वंगु चैत २३ व २४ गते निन्हुयंकं जूगु उगु सम्मेलन लमजुङ जिल्लाया बेशीसहरय् जूगु खः ।सम्मेलनया न्हापांगु दिं जूगु शान्ति पदयात्राय् द्वलंद्वः लमजुङवासीतय् सहभागिता दुगु खः । सम्मेलनया उलेज्या गण्डकी प्रदेशया मुख्यमन्त्री पृथ्वी सुब्बा गुरुंगं यानादीगु खः ।

सम्मेलनयात संबोधन यासें मुख्यमन्त्री गुरुंगं भगवान बुद्धया सन्देश थुकथं न्यंकेगु ज्या याःगुलिं लसता प्वंकुसे सम्मेलनया ग्वसाः खलः धर्मोदयया ज्यायात कयाः च्वछायादिल । लिसें वय्कलं थुकथंया बौद्ध सम्मेलन थःगु हे छेँक्वसं जूगुलिं लसता प्वंकादिसें लमजुङवासी नापं पहाडी क्षेत्रयापिंसं नं भगवान बुद्धया सन्देशया बारे आपालं जानकारी काये फइगु विश्वास प्वंकादिल ।

उगु इलय् धर्मोदय सभाया महासचिव सागरमान वज्राचार्यंं सम्मेलनया उद्देश्य व औचित्व बारे जानकारी बियादिसें २०७२ सालया तःभुखाचं यानाः दिनाच्वंगु राष्ट्रिय बौद्ध सम्मेलन थुगुसी सफलतापूर्वक याये खंगुलिं लसता प्वंकादिल । सम्मेलनय् धर्मोदय सभां प्रत्येक निदँय् छक्वःलःल्हाना वयाच्वंगु नीन्याद्वः तका दांलिसें अभिनन्दन पत्र सहितया ‘धर्मोदय धम्म सम्मान पुरस्कार’ थुगुसी नांजाःम्ह बौद्ध विद्वान प्रा. डा. वज्रराज शाक्ययात लःल्हाःगु खः।

अथे हे सभाया वरिष्ठ उपाध्यक्ष लक्ष्मीदास मानन्धरं मदुम्ह लक्ष्मीदेवी मानन्धरया पुण्य स्मतिइ नीस्वनादीगु म्हति १२,५०० तका दां सहितया सम्मानपत्र क्या. रणबहादुर गुरुंग व क्या. जग गुरुंगयात लःल्हाःगु खः ।

चैत २४ गते सम्मेलनया समापन यासें गण्डकी प्रदेशया अर्थमन्त्री किरण गुरुंगं सम्मेलन सफलतापूर्वक सम्पन्न जूगुलिं ग्वसाः खलः लगायत लमजुङवासीयात भिंतुना व सुभाय् देछासे भगवान बुद्धया शिक्षायात नुगलंनिसें हे अनुशरण याये फत धाःसा जीवन सुखमय जुइ धासें ग्वाहालि यानादीपिं सकसितं सुभाय् पौ नं लःल्हानादीगु खः ।

समाजशास्त्रीलिसें जनजाति आन्दोलनया न्ह्यलुवा डा. कृष्ण भट्टचतं ‘२०७८ सालया नेपाःया राष्ट्रिय जनगणनाय् बौद्धतय् सरोकार व भूमिका विषयय् ज्यापौ न्ह्यब्वयादीगु सम्मेलनय् ४३ गू जिल्लाया सहभागिता दुगु खः ।

 

सम्बन्धित बुखँ

LEAVE YOUR COMMENTS