यलया पूर्णचण्डीइ छवाःयंकं श्रीदेवीयाग लक्षाहुति यज्ञ जुइगु

यल – थनया गाःबहाःस्थित पूर्णचण्डी द्यःयाथाय् कंसनिसें श्रीदेवीयाग लक्षाहुति तथा नवग्रह शान्ति यज्ञ जुइगु जूगु दु । उपाकर्म गुथि व्यवस्थापन समिति अन्र्गत श्री देवीयाग लक्षाहुति तथा नवग्रह शान्ति यज्ञ आयोजक समितिया ग्वासलय् स्वनिगःया कौलिक देग ब्राम्हणतय्गु सक्रियताय् देशय् शान्ति व कल्याणया कामना यासे चैत १० गते आइतवाःनिसें न्ह्याइगु यज्ञ शनिवाः क्वचाइ ।

ग्रह दोषया कारणं ज्या मजुइगु, ल्वचं कइगु, छेँ व समाजय् कचावं ब्वलनाच्वनीगु धार्मिक मान्यता दया वयाच्वंगु अवस्थाय् थुगु यज्ञ शक्तिया उपासना यानाः रुप, जय व यशयालिसें मनंतुंगु फल प्राप्त जुइगु धार्मिक मान्यता दया वयाच्वंगु दु । थ्व हे कारणं देशय् शान्तिया वातावरणलिसें देशवासीया कल्याण, सामाजिक सद्भाव, शान्ति कायम जुयाच्वनेमा धइगु उद्देश्यं थुगु यज्ञ यायेत्यनागु ग्वसाः खलकं जानकारी बिउगु दु ।

यज्ञया ज्याझ्वः कथं १० गते न्हापांगु न्हि पंचगव्य, वृद्धि श्राद्ध व मू कलश स्थापना यायेगु वया लिपा प्यन्हुतक अग्नि स्थापना यानाः देवी मन्त्रपाखें आहुति, चतुर्वेद पाठ, सिद्धेश्वर महाद्यःयात जलाभिषेक, श्री सप्तसति चण्डी पाठ प पूर्णचण्डी देवीया पुजा जुइ । यज्ञया दकलय् लिपांगु न्हिं देर्गा देवीया व्रतपुजा कुमारी पुजा यानाः यज्ञ विसर्जन जुइगु ग्वसाः खलकं जानकारी बिउगु दु ।

यज्ञपाखें संकलन जूगु ध्यबा गुथिं दँय्दसं गुलांगा पंचमिकुन्हु पिहां वइगु भगवान नृसिंह जात्रा (उपाकलं सायाः)या निंतिं छ्यलेगु लक्ष्य कयातःगु दु । उपाकर्म गुथिं उपाकर्म संस्कारलिसें दँय्दसं विश्व शान्तिया कामना यासें नृसिंह जात्रा पिथनेगु याना वयाच्वंगु दु ।
लिखित रुपय् थ्व जात्रा संचालन जूगु ३८८ दँ पुलांगु खने दु ।

 

सम्बन्धित बुखँ

LEAVE YOUR COMMENTS