थौं तारादेवीया लुमन्तिइ सांगीतक ज्याझ्वः

येँ – स्वरकिन्नरी तारादेवी श्रेष्ठया झिंस्वक्वःगु पुण्य तिथिइ लाकाः वय्कःया लमुन्तिइ छगू तःजिगु सांस्कृतिक ज्याझ्वः जुइगु जूगु दु । तारादेवी स्मृति फाउण्डेसनया ग्वसालय् थौं माघ ९ गते थनयाराष्ट्रिय सभागृहय् उगु ज्याझ्वः जू वनाच्वंगु दु । फाउन्डेसनं छगू पत्रकार सम्मेलन यासें ‘सम्झनामा तारादेवी’ नामं उगु ज्याझ्वः याये त्यनागु जानकारी बिउगु दु ।

संवाद चौतारीइ जूगु पत्रकार सम्मेलनय् स्वरकिन्नरी तारादेवीया झिंस्वक्वःगु पुण्य स्मृति लाकाः उगु ज्याझ्वःया ग्वसाः ग्वयेत्यनागु जानकारी बिउगु खः । ज्याझ्वः ताःलाकेत न्याम्हेसिया छगू ज्यासना पुचः नं नीस्वनातःगु दु । ज्यासना पुचःया संरक्षकय् रवि श्रेष्ठ, अध्यक्ष दीपक केसी, उपाध्यक्ष भुवन चन्द, महासचिव सोभन सैंजू व कोषाध्यक्षय् रमेश थापा च्वनादीगु दु ।

पत्रकार सम्मेलनय् येँ क्षेत्र नं ७ या सांसदलिसें संस्थाया सल्लाहकार रामवीर मानन्धरं श्रष्टातय्गु सम्मान व कलाया कदर यासें संरक्षण व व्यवस्थापन यायेत सरकारया ध्यानाकर्षण यानादीगु खः ।

अथे हे संस्थाया अध्यक्ष केसीं कलाकारत धइपिं देय्या तिसा खः धकाः धायेगु याःसां नं इमिसं थःगु न्हिथंया जीवन न्ह्याकेत तकं तसकं थाकुया वनाच्वंगु धयादिल । तारादेवीया लमुन्तिइ थौं जू वनाच्वंगु ज्याझ्वलय् नांजाःपिं म्येँ हालामिपिं ज्ञानु राणा, मिरा राणा, संगीता शाक्य लगायतं तारादेवीया लोकंह्वाःगु म्येँ न्ह्यब्वइगु नं पत्रकार सम्मेलनय् जानकारी बिउगु खः ।