योगेश भट्टराईयात पहिचानवादीतय् आक्रमण
येँ (नेपालभाषा टाइम्स)÷नेकपा एमालेया सचिव लिसें प्रतिनिधिसभाया दुजः योगेश भट्टराई च्वनावःगु गाडी तोडफोड जूगु दु । म्हिगः ताप्लेजुङं येँ लिहां वयेगु झ्वलय् ताप्लेजुङया सदरमुकाम फुङलिङया बसपार्क लिकसं पहिचान पक्षधरतय्सं नेता भट्टराईया गाडीइ आक्रमण याःगु खः ।
च्याम्ह झिम्हेसिया पुचलय् वःपिं पहिचानवादीतय्सं भट्टराई च्वनावःगु गाडीइ अप्पां छ्यायेगु व कथिं दायेगु ज्या याःगु खँ एमालेया कार्यवाहक जिल्ला अध्यक्ष सन्तोष खतिवडां कनादीगु दु । आक्रमणय् लानाः भट्टराई च्वना वःगु गाडीया न्ह्यःनेया ब्वय् क्षति जूगु दु । भट्टराईया गाडीयात सशस्त्र व नेपाल प्रहरीं स्कर्टिङं यानायंकूगु खः । गाडीया न्हाय्कं नं तज्याःगु दु । थ्व स्वयां न्ह्यः म्हिगः एमालेया कार्यकर्ता व पहिचान पक्षधर कार्यकर्तातय् दथुइ ल्वापु जूगु खः ।
मोहनि, स्वन्ति व छठ पर्वया लसताय् एमाले ताप्लेजुङ कमिटीं तुच्चा ज्याझ्वः याःगु खःसा उगु ज्याझ्वलय् सांसद भट्टराई, सांसद उर्मिला थेवे व कोशी प्रदेशसभा दुजः तिलकुमार मेन्याङ्बो थ्यंगु खः । न्हिनय् १ बजे पार्टी कार्यालयय् जूगु तुच्चा ज्याझ्वः क्वचायेकाः लिहां वयेगु झ्वलय् भट्टराईयात आक्रमण याःगु खः ।
थ्व स्वयां न्ह्यः नेकपा एमालेया सचिव योगेश भट्टराईया ताप्लेजुङ सदरमुकाय् च्वंगु छेँया न्ह्यःने नं पहिचानवादीतय्सं प्रदर्शन याःगु दु । म्हिगः सुथय् पहिचानवादीतय्सं हाकुगु ध्वाँय् सहित फुङलिङस्थित भट्टराईया छेँ न्ह्यःने प्रदर्शन याःगु खः ।
कोशी प्रदेशया नामाकरणय् हस्ताक्षर याःपिं सांसदतय्त पहिचानवादीतय्सं विरोध यायेगु लिसें थीथी कथं ख्याच्वः बिया वयाच्वंगु दु । म्हिगः सुथय् पहिचानवादीतय्सं एमाले पार्टीया ज्याकू न्ह्यःने नं छझाः धर्ना बिउगु खः । म्हिगः पहिचानवादीतय्सं कोशी प्रदेश च्वयातःगु ब्यानरसहित ज्याझ्वः मयायेत नं ख्याच्वः बिउगु खः ।
प्रदेश नम्बर १ पुनः नामांकरण संयुक्त संघर्ष समितिं कोशी प्रदेशया नां खारेज यायेमाःगु माग यासें आन्दोलन याना वयाच्वंगु दु । थ्व स्वयां न्ह्यः पहिचान विरोधी जूगु धासें एमालेया सांसद मेन्याङ्बो व माओवादीया नेता इन्द्र आङ्बो लगायतया नेतातय्त नं पहिचानवादीतय्सं उगु हे क्षेत्रय् आक्रमण यायेधुंकूगु दु ।
LEAVE YOUR COMMENTS