आयोना लाखां त्याकल हुलाप्याखं कासा
यल (नेपालभाषा टाइम्स)÷ नेपाल संवत् ११४५ न्हूदँ व स्वन्ति नखःया लसताय् यल महानगरपालिका १६ वडा कलाकार समितिया ग्वसालय् जूगु निक्वःगु हुलाप्याखं कासाय् आयोना लाखा न्हाप जूगु दु । नीस्वम्ह कासामिं ब्वति काःगु धेंधेंबल्लाखय् ख्वपया आयोनां शिल्ड, दसिपौलिसें ५० द्वः तकाः नगद सिरपा त्याकूगु दु ।
कासाय् यल चाकुपातया इभान धाख्वा ल्यू, काय्गुननिया लक्कि महर्जन लियांल्यू व न्याखाचुकया उत्पला बज्राचार्य लियांल्यू लाःगु खः । ल्यू, लियांल्यू व हःपाः लाःपिंत छसिकथं शिल्ड, दसिपौलिसें नगद सिरपा स्वीद्वः, झिंन्याद्वः व न्याद्वः तका लःल्हाःगु खः ।
यलया कात्तिदबुलिइ जूगु उगु कासाया झ्वलय् वरिष्ठ लोकगायक रत्न बेहोशी बज्राचार्ययात “ललितरत्न” उपाधि देछासें हंगु खः । कला ख्यलय् जीवन पानादीम्ह बज्राचार्ययात दोसल्लां न्ययेकाः हनापौलिसें झिंन्याद्वः तका देछाःगु खः ।
यल महानगरपालिका १६ वडाया अध्यक्ष निर्मलरत्न शाक्यया नायः व कलाकार समितिया संयोजक सुरजवीर बज्राचार्यया ल्यूनायः यानाः न्ह्याःगु ज्याझ्वलय् जनसंगीत श्रष्टा अमरराज शर्मा राजोपाध्याय मूपाहां कथं झायादीगु खः । धेंधेंबल्लाखय् निर्णायककथं संजय शर्मा राजोपाध्याय, स्वजन रघुवंशी, श्रृष्टि महर्जन च्वनादीगु खः ।
LEAVE YOUR COMMENTS