‘गणतन्त्रया समीक्षा या’

येँ (नेपालभाषा टाइम्स)÷पुलांम्ह जुजु ज्ञानेन्द्र शाहं देशय् गणतान्त्रिक व्यवस्था वयेधुंकाःया राजनीतिक अवस्था बारे समीक्षा याये माःगु बिचाः न्ह्यःने तयादीगु दु ।

थौं ६८ क्वःगु प्रजातन्त्र दिवसया लसताय् छगू विज्ञप्ति जारी यासें वय्कलं थ्व बिचाः न्ह्यथनादीगु खः । थःगु विज्ञप्तिइ वय्कलं वि.सं. २०६३ वैशाख ११ गते लिपा देशय् गुगु राजनीतिक परिवर्तन वःगु खः उकिया समीक्षा यायेमाःगु खँ धयादीगु खः ।

छुं सीमित मनूतय्गु स्वार्थ रक्षा जुइगु ज्यायात हे प्रजातन्त्र धाइगु खः ला धइगु न्ह्यसः तसें वय्कलं देशय् थ्व परिवर्तन हयेगु लागिं जूगु थीथी कथंया सहमति, सम्झौता व समझदारीया इमान्दारीपूर्वक कार्यान्वयन समेत मजूगु द्वपं नं बियादीगु दु । वय्कलं न्ह्यसः तयादीगु दु, ‘थज्याःगु विकृतिपूर्ण अवस्थायात नेपाली जनतां गबले तक सह यानाच्वनेगु ?’