इहिपा लिपा नेवाः हिरोइन
“इहिपा”व“भिन्तुना” या संजोग
बलिउड व कलिउड धकाः धयातःगु खँय् भाय्या फिल्मय् आपालं हिरोइनत इहिपा लिपा तनांवंगु खनेदु । नेवाः फिल्मबारे चिउताःदुपिं आपाःसिनं सिउ हे जुइमाः कि च्यादँति न्ह्यः निर्देशक सुरेश बज्राचार्यं “इहिपा” नांयागु छगू नेवाः फिल्म दयेकूगु दु । थ्व फिल्मया छम्ह हिरोइनया नां रेश्मी महर्जन ।
निर्देशक आर्यम नकःमिया “भिन्तुना” नांयागु फिल्मं डेब्यु याःम्ह रेश्मी महर्जनं लिपा वनाः “महारानी” नांयागु फिल्म नं म्हितल । वयां लिपा वयागु इहिपा जुल । अनं लिपा छगू निगू म्युजिक भिडियो त्वःताः फिल्म म्हितूगु खनेमदुनि । छम्ह निम्ह हिरोइनतय् चर्चा यायेबलय् “इहिपा” व “भिन्तुना” नांयागु निगू फिल्मया नांया संजोग चूलानाच्वंगु खनेदइ ।
गथेकि “भिन्तुना” फिल्मया मेम्ह हिरोइन रेमा महर्जन नं इहिपा लिपा फिल्म ख्यलं तापाना वंम्ह हिरोइन खःसा “इहिपा” फिल्मय् रेश्मी म्हिते न्ह्यः भिन्तुना जोशी म्हितीगु खँ जुयाच्वंगु खः, तर उगु इलय् नकतिनि नकतिनि जक इहिपा याःम्ह भिन्तुनां जोशीं “इहिपा” फिल्मया निंतिं ई फ्याये मफुबलय् उगु फिल्मय् रेश्मी महर्जनयात हिरोइन दयेकूगु खः ।
लिपा वनाः भिन्तुनां “मनू म्हसीकि”, “मू मदुगु जिन्दगी”, “थ्वला ग्यानापु स्टाइल” व “स्वयेनगु” फिल्म म्हितलसा “पानबति” फिल्मय् गेस्ट रोल म्हितल । थुलि त्वःताः भिन्तुना जोशीं थ्व च्यादँ दुने मेगु फिल्म म्हितूगु खनेमदुनि ।
आशिष्मा व सनम शाक्य
“पानबति” फिल्मय् हिरोइन जुयाः नेवाः फिल्मय् खनेदयेकः वःम्ह सनम शाक्यं वयां लिपा “वल वल फसिक्वाः” नांयागु फिल्म म्हितलसा लिपा वनाः वयागु इहिपा जुल अले फिल्मं तन । हिरोइनतय्गु इहिपाया चर्चा यायेबलय् दकलय्–सकलय् बय्बय् जूगु इहिपा धइगु आशिष्मा नकःमिया इहिपा खः ।
आशिष्माया इहिपाया खबर आकाझाकां वःबलय् गुलिसिनं पत्याः तकं मयाः । वं इहिपा याये लाबलाति न्ह्यः जक “लाखेभाजु” नांयागु छगू फिल्मया निर्माण ज्या तकं न्ह्याका थः थ्वहे ख्यलय् समर्पित जुइगु धकाः घोषणा तकं याःगु खः ।
ताः ईतक अमेरिकाय् च्वनाः लिहां वयाःलि खस नेपाली फिल्मपाखे पलाः न्ह्याकूम्ह आशिष्मां “मू मदुगु जिन्दगी” नांयागु फिल्म म्हितूगु खःसा वयां लिपा “रश्मी” नांयागु छगू फिल्म नं म्हितल तर थ्व फिल्म धाःसा आःतक पिहां वःगु मदुनि । इहिपा लिपा अमेरिकाय् हे तिपू जीवन हनाच्वंम्ह आशिष्मां लिपांगु इलय् छगूनिगू म्युजिक भिडियो धाःसा म्हितूगु दु ।.
इहिपा न्ह्यः तनावंम्ह
थथे इहिपा लिपा तनावंपिं हिरोइनत ला आपालं दु । तर सुमिका बज्राचार्य नांयाम्ह छम्ह हिरोइन धाःसा इहिपाया न्ह्यः हे तनावंम्ह हिरोइन खः । ‘सर्गःमिला’ व ‘हाकु सुपाँय्’ थेंज्याःगु फिल्मया हिरोइन सुमिका बज्राचार्ययात उगु ईया साप हे बांलाःम्ह हिरोइनया रुपय् काःगु खः ।
तर “सर्गःमिला” म्हिताच्वंगु इलय् हे उगु फिल्मया हिरो राजेश महर्जनलिसे मतिना जूबलय् फिल्मख्यः त्वःताः एअर होस्टेसया ज्या याःम्ह सुमिका बज्राचार्यं खुदँति लिपा वनाः तिनि राजेश महर्जनलिसे औपचारिक रुपं इहिपा याःगु खः । “मतिनाया कलि” नांयागु फिल्मय् म्हितूम्ह मधु शाही नं फिल्मख्यलं तनावंम्ह हिरोइन खः ।
देश त्वःतावंपिं
इहिपा लिपा तनावंपिं हिरोइनत मध्ये छम्ह सिन्तिया सेन ताम्राकार नं खः । “सत्य धरोधर्म”,“यलेबाथः” व “तुतां” थेंज्याःगु फिल्म म्हितूम्ह सिन्तिया सेन ताम्राकारयात नं उगु ईया छम्ह बांलाःम्ह हिरोइनया रुपय् काःगु खःसां आकाझाकां इहिपा यानाः थ्व ख्यःजक मखसे देश हे त्वःतावन । इहिपा लिपा देश त्वःतावंपिं मेपिं हिरोइनय् दिपा शाक्य छम्ह नं खः ।
“जिपिं बदमाश मखु” फिल्मया हिरोइन दिपा शाक्य इहिपा लिपा विदेशय् वनाः च्वंवंगु खःसा आः थौंकन्हय् पोखराय् तिपू जीवन हनाच्वंगु दु । दिपा शाक्य ला विदेशं नेपाः वल तर “भिन्तुना”या हिरोइन रेमा महर्जन इहिपा यायेत छक्वः नेपाः वल, इहिपा यात अले हाकनं अमेरिकाय् तुं वनाछ्वत ।
अथे हे तुं विदेशय् च्वनाच्वंम्ह मेम्ह हिरोइन धइम्ह मीरा मालि नं खः । “छ हे मदुसा”, “निफ्वःस्वां”, “थःम्हं म्हुगु गाः” फिल्मया हिरोइन मीरा माली नं इहिपा लिपा विदेशय् च्वनाच्वंम्ह हिरोइन खः । “निफ्वःस्वां”या हे छम्ह मेम्ह हिरोइन गीता शाही नं विदेशय् हे च्वनाच्वंगु दु ।
इहिपा लिपा अझ अप्वः व्यस्तपिं
थुकथं स्वयेबलय् नेवाः फिल्म ख्यलय् च्वंपिं आपालं हिरोइनत इहिपा लिपा थ्व ख्यलं तापाना वंगु खनेदतसा छम्ह निम्ह हिरोइन अज्याःपिं नं दु गुम्हेसिनं इहिपा लिपा कलाकारिता ख्यलय् अझ अप्वः सकृयता क्यना वयाच्वंगु दु ।
अज्याःपिं मध्ये दकलय् चर्चित नां धइगु हिसिला महर्जनया नां खः । नीन्यादँति न्ह्यः “राजमति” जुया थ्व ख्यलय् वःम्ह हिसिला महर्जनं उगु इलय् “चाण्डालिका” नांयागु छगु फिल्म बाहेक मेगु फिल्म म्हितूगु मदु ।
अनं लिपा हिसिलाया राजमति फिल्मया हे हिरो मणि राजलवटलिसे इहिपा जुल । छखे मेपिं हिरोइनत इहिपा लिपा कलाकारिता ख्यलं तापाना वंगु खनेदुसा हिसिला धाःसा इहिपा जूगु छुं ई लिपा थःहे जहान मणि राजलवटलिसे छुं छुं म्युजिक भिडियोय् खनेदयेकः वल ।
म्युजिक भिडियोपाखें कलाकारिता ख्यलय् लिहांवःम्ह हिसिलां लिपा वना “त्याग” नांयागु छगू नेवाः फिल्म म्हितलसा व धुंकाः थःगु मातृभूमि किपूया इतिहास न्ह्यब्वयातःगु नेपाली फिल्म “कीर्तिपुर ः द लिजेण्ड अफ कीर्तिलक्ष्मी” नं म्हितल ।खय्त ला हिसिलां “तुयुमति” फिल्मय् थःहे जहान मणि राजलवटनाप जानाः गेस्ट रोल म्हितूगु दु । तर थौंकन्हय् धाःसा छगू निगू म्युजिक भिडियो बाहेक मेगु फिल्मय् म्हिताच्वंगु खनेमदु ।
इहिपा लिपा कलाकारिता ख्यलय् थःगु सकृयता अप्वयेकूम्ह छम्ह हिरोइन रोजिना सुवाल नं खः । “चन्द्रमान” व “थ्वला ग्यानापु स्टायल” थेंज्यागु फिल्म म्हितूम्ह रोजिना सुवालं इहिपा लिपा थ्व ख्यलय् थःगु सकृयता अझ अप्वयेकूगु दु ।
छम्ह संगीतकारया रुपय् नांजाःम्ह मोहित मुनाललिसे इहिपा याःम्ह रोजिनां इहिपा लिपा आपालं म्युजिक भिडियो म्हितलसा “तिनतिकः महाबिकः” लगायत मेमेगु फिल्म नं म्हितलसा थौंकन्हय् कलाकारिताया थीथी ख्यलय् रोजिनाया सकृयता न्हियान्हिथं अप्वया वयाच्वंगु दु ।
दकलय् लिपा
गुलिखे हिरोइनत इहिपा लिपा तनावनसा गुलिखे हिरोइनं इहिपा लिपा नं थःगु पलाः न्ह्याका हे च्वंगु दनि, तर छम्ह हिरोइन अज्याःम्ह नं दु, गुम्हेसिया फिल्मी यात्रा थःगु न्हापांगु पलाः न्ह्याये न्ह्यः हे दिना वन ।
थथे तनावंम्ह छम्ह हिरोइन सचि राजोपाध्याय खः । “थः कतः कतः थः”या हिरोइन सचि राजोपाध्यायं व हे फिल्मया निर्देशक जितेन्द्र राजोपाध्यायलिसे इहिपा यानाः तिपू जीवन हनावयाच्वंगु दु । हिरोइनया रुपय् थःगु पलाः न्ह्याये न्ह्यः हे पलाः दिकूम्ह हिरोइनया नां सम्झना श्रेष्ठ नं खः ।
नांजाःम्ह ख्यालिम्वः श्रीकृष्ण अणुया निर्देशनय् दयेकेज्या न्ह्याःगु “सितुलानी” नांयागु टेलिफिल्मया हिरोइन सम्झना श्रेष्ठया रुप व अभिनय गुणयात उगु इलय् आपाःसिनं तारिफ याःगु खःसा “सितुलानि” पिहां वल कि सम्झनाया थाय् नेवाः फिल्म ख्यलय् छम्ह लोकंह्वाःम्ह हिरोइनया रुपय् न्ह्यःने वइ धकाः तकं धायेगु याःगु खः तर उगु फिल्मया ज्या पूमवन । अले छम्ह हिरोइनया पलाः न्ह्याये न्ह्यः हे दित ।
LEAVE YOUR COMMENTS