गज्याःगु संस्कार संकिपाया शुटिङ्ग क्वचाल

येँ (नेपालभाषा टाइम्स) – नेपालभाषाया न्हूगु संकिपा ‘गजाःगु संस्कार’ या शुटिङ्ग क्वचाःगु संकिपा निर्माण पक्षं जानकारी बिउगु दु । संकिपाया शुटिङ्ग क्वचाःसां प्रदर्शनय् वयेत धाःसा छुं ई काइगु जुइगु जूगु दु ।

संकिपाया प्यपुमध्ये टाइटल म्येँ छपु जक शुटिङ्ग क्वचाःगु व स्वपु म्येँया छाँयाकनं ल्यं दनिगुलिं प्रदर्शनय् वयेत छुं ई काइगु निर्माण पक्षं जानकारी बिउगु दु ।

नेवाः म्हसीकालिसें भाषा, कला, संस्कृति व संस्कारया विषयय् दुथ्यानाच्वंगु संकिपाया मुख्य कलाकारय् वरिष्ठ अभिनेता मदनदास श्रेष्ठ, नारायणदेवी श्रेष्ठ सीमान्त उदास, शोभा महर्जन, विनोद श्रेष्ठ, सलोना वज्राचार्यया मू भूमिका दुसा मेपिं निगू दर्जनं मल्याक कलाकारया नं अभियन दुथ्यानाच्वंगु दु ।

संकिपाया बाखं रामगोपाल दर्शनां च्वयादीगु खःसा पटकथा व संवाद पवन जोशीया दुथ्यानाच्वंगु दु । संकिपाया निर्देशक अमृतमान महर्जन खःसा तारादेवी श्रेष्ठ व सम्झना श्रेष्ठं निर्माण यानादीगु खः । संकिपाया छाँयाकनं नारायण डीसीं यानादीगु खः । ल्यं दुगु स्वपु म्येँया छाँयाकन क्वचायेवं संकिपा प्रदर्शनय् हयेगु निर्देशक महर्जनं कनादीगु दु ।