नेवाः फिल्मया खँ

नेवाः फिल्मया गतिविधि थौंकन्हय् अप्वया वयाच्वंगु दु । नेवाः फिल्म स्वइपिं नं अप्वया वयाच्वंगु दु । थौंकन्हय् क्यना वयाच्वंगु नेवाः फिल्मय् वाया दुने जाकि दु, स्वय्नगु, बसन्त ऋतु थेंज्याःगु नेवाः फिल्म स्वःवःपिं स्वकुमिया ल्याखं क्यँ कि थौंकन्हय् स्वकुमि दथुइ नेवाः फिल्म स्वयेगु चाहना न्हियान्हिथं अप्वया वयाच्वंगु दु । थ्व ई धइगु सुचना प्रविधी (इन्फर्मेशन टेक्नोलोजी)या ई खः । थुकिया लबः कयाच्वंपिं यक्व दु । विशेष यानाः फिल्म व मनोरञ्जन ख्यःया निंतिं ला सुचना प्रविधी धइगु छगू मजिमगाःगु प्रविधी जुइ धुंकल । संसारया न्ह्यागु नं देशया फिल्मं थ्व प्रविधीया लबः कयाच्वंगु दु । युट्युब थुकिया दसु खः । झीगु थेंज्याःगु चिधंगु बजाः दुगु थासय् युट्युबलगायत सुचना प्रविधीया मेमेगु प्रविधीपाखें लबः कयाच्वंगु मदु । नेपालय् खस नेपाली फिल्म व मनोरञ्जन ख्यलं थथे लबः कयाच्वंगु दु, तर नेवाः फिल्मं धाःसा थुखेपाखेया लबः काये फयाच्वंगु मदु ।

विमानय् नेवाः फिल्म
सुचना प्रविधीया हे छगू थाय् कथं थौंकन्हय् लङ्ग रुटया विमानय् यात्रुया निंतिं मनोरञ्जनया थीथी हलंज्वलं तयातःगु दइ । आः वया नेपाःया थःगु हे विमान कम्पनी नेपाल वायुसेवां नं निगः निगः वाइडबडी विमान नेपाः दुत हयेधुंकलसा अगस्टया १ तारीखनिसें सेवा नं शुरु याये धुंकल । थज्याःगु लङ्ग रुटया विमानय् आः नेपाःया फिल्म क्यनेगु निर्णय जूकथं नेपाःया आदिबासी जनजाति मातृभाषी फिल्म दयकीपिनिगु मंकाः संस्था आदीबासी जनजाति चलचित्र महासंघया कुतलं नेपाल वायुसेवाया विमानय् आदिबासी जनजाति भाय्या फिल्म नं क्यनेगु क्वःछीधुंकूगु अवस्था दु । उकिया निंतिं फिल्म दुतिनेत महासंघं थःगु फेसबुकं सुचं नं पितबिल । उगु सुचं नेवाः फिल्मकःमितक थ्यंकेगु कुतः कथं गुलिखे नेवाः फिल्मकःमिपिनिगु फेसबुकय् ट्याग नं जुल । ल्यासे–ल्याय्म्हतय्गु फोटो वा मेमेगु फोटो ट्याग जुइबलय् वा फेसबुकय् पोस्ट जुइबलय् सलंसः लाइक व कमेण्ट दइगु खःसा नेवाः फिल्मयात हे लबः दइगु सुचनय् लाइक व कमेण्ट उलि खनेमदु । उलिजक मखसे नेवाः फिल्मकःमिपिंसं थुकियाबारे छुं नं कथंया न्यनेकने याःगु तकं खनेमदु । नेवाः फिल्मकःमिपिनिगु हकहितया निंतिं नीस्वनातःगु संस्थात नेवाः फिल्म सोसाइटी व नेपालभाषा संकिपा समाजं थुखेपाखे गज्याःगु पलाः ल्ह्वन धइगु खँ नं सीमदु ।

“जेण्टलमाएन”य् हिरो सु जुइ ?
नेवाः फिल्मया चर्चा यायेबलय् छुं ई न्ह्यवंनिसें बय्बय् जुयाच्वंगु फिल्म धइगु “जेण्टलमाएन”छगू नं खः । नेवाः फिल्म व कलाकारिता ख्यलय् थीथी उपकारी ज्या याना वयाच्वंगु सुखावति मल्टि प्रोडक्शनं दयेकेत्यंगु थ्व फिल्मया निर्देशक सुरेन्द्र तुलाधर खः । थगुने हे घोषणा जूगु थ्व फिल्मय् सनिश शाक्य हिरो जुइगु खँ जूगु खःसा हिरोइनय् आशिष्मा नकःमि, सलोना बज्राचार्य व इक्रिना बलया नां पितबिउगु खः ।

उगु इलय् शुटिंग शुरु जुइगु इलय् “जेण्टलमाएन”या हिरो सनिश शाक्य नेवाः फिल्म ख्यलय् स्वंगू करोड तका लाय् तयाः सुपर बीग बजेट फिल्मया रुपय् बय्बय् जूगु “च्वापुफय्”या शुटिंगय् तक्यनाः “जेण्टलमाएन”या निंतिं ई फ्याये मफुगुलिं शुटिंग न्ह्यायेमफुगु खः । ताः ईतक नं सनिश शाक्यं ई फ्यायेमफयाः दिनाच्वंगु “जेण्टलमाएन” या शुटिंग आः धाःसा याकनं जुइत्यंगु दु धइगु हुइनाभुइना पिहां वयाच्वंगु दु ।
थथे याकनं शुटिंग जुइन धकाः चर्चा जुयाच्वंगु “जेण्टलमाएन” फिल्मय् हिरो सु जुइ ले धइगु न्ह्यसः ब्वलनीगु स्वाभाविक हे खः । अले थुकी हिरो जुयाः म्हितीम्हेसिया नां सिल कि न्ह्याम्हं छक्वः अजू चायेफु । छाय्धाःसां व हिरो जुयाः म्हितीम्ह कलाकारया नां हे अज्याःगु खः कि न्यन कि अजू मचाइ हे मखु । उम्ह हिरो मेम्ह सुं हे मखसे नेपाःया ख्यालिजुजु कथं नांजाःम्ह मदनकृष्ण श्रेष्ठया काय यमन श्रेष्ठ खः ।

अबु मदनकृष्ण श्रेष्ठया पालिख्वाँय् लिनाः ख्यालिन्हिला ख्यलय् पलाः न्ह्याकाच्वंम्ह यमन श्रेष्ठया नेपालभाषां छुं ई न्ह्यःतिनि वल्र्डकप फुटबल कासायात कयाः नेवाः म्येँया म्युजिक भिडियो पिदंगु खःसा उगु भिडियो आपालं लोकं नं ह्वाःगु खः । न्हापा घोषणा जूबलय् आशिष्मा, सलोना व इक्रिना नापं यानाः स्वम्ह स्वम्ह हिरोइनया नां पिहां वःगु खःसा आः हिरोइन सु जुइगु खः धइगु खँ धाःसा सीमदुनि ।

“मां” फिल्मय् नं कलाकार हिलीगु
“जेण्टलमाएन” फिल्मय् कलाकार हिलीगु खँ पिहां वःथें हे तुं निर्देशक सुरेश खड्गीया “मां” नांयागु संकिपाय् नं छम्ह कलाकार हिलीगु हुइनाभुइना जुयाच्वंगु दु । थगुने हे तःजिक भिंसाइत चूलाकूगु “मां”या छन्हुया शुुटिंग थगुनेया सायाःबलय् हे क्वचायेके धुंकल । फिल्मया बाखं कथं छेँजः मदये धुंकाः सायाःबलय् सा छ्वयेमाःगु व उकी फिल्मय् मां जुयाः म्हिताच्वंम्ह साहित्यकार शशीकला मानन्धरं ब्वति काःगु खःसा वय्कः नापनाप मांया मचा जुयाः म्हिताच्वंपिं मचा कलाकारपिंसं ब्वति काःगु खः ।

थ्व शुटिंग जूगु नं थौं धाधां कन्हय् धाधां दछि दइनसा आः तक उगु शुटिंग धुंका “मां” फिल्मया मेगु शुटिंग जूगु मदुनि । बरु शुटिंगया तयारी कथं रिहर्सल धाःसा जुयाच्वंगु दु । थुकथं दिनाच्वंगु “मां” या शुटिंग नं आः याकनं हे जुइगु खँ दुसा थुकी नं छम्ह कलाकार हिलीगु खँ दु । थौंकन्हय् जुयाच्वंगु हुइनाभुइना कथं “मां” फिल्मय् टिनएज हिरोया रोल म्हितेया निंतिं संगीतकःमि बालकृष्ण बंशीया झिंप्यदँ झिंन्यादँ तिनि दुम्ह काय बिप्लव खड्गीलिसे स्वापू तःगु खँ पिहां वयाच्वंगु दु ।

आः बिप्लवयात “मां” फिल्मय् छु रोलय् न्ह्यब्वइगु खः व सुया थासय् तयेत्यंगु खः धइगु खँ आःयात सस्पेन्स हे तिनि । अथे हे तुं थ्व फिल्मया छम्ह हिरो किशोर खड्गीलिसे हिरोइन कथं क्वःछिनातःम्ह भिन्तुना जोशी नं थौंकन्हय् विदेशय् हे अप्वः च्वनेगु यानाच्वंगुलिं आः हिरोइनया खँ छु जुइगु खः धइगु खँ नं चिउताःया विषय जुयाच्वंगु दु ।

“घोषक” य् नं हिलिगु
कलाकारया हिलाबुलाया चर्चाय् लानाच्वंगु मेगु छगू फिल्म “घोषक” नं खः । सञ्चारकःमि कथं नांजाःम्ह दर्शनबीर शाक्यया च्वसां बुद्धकालिन बाखनय् च्वःगु थ्व “घोषक”या निर्माता रोशन बज्राचार्य खःसा थुकिया निर्देशक अमृतचन्द्र श्रेष्ठ खः ।

खय्त ला निदँति न्ह्यः हे घोषणा जूगु थ्व “घोषक” फिल्मया कलाकारया नां आः तक गनं पिदंगु मदुनि तर दुुनेंदुनें सीदुकथं थुकी नेपाःया फिल्म ख्यःया लोकंह्वाःम्ह हिरो कर्मायात हिरो कथं म्हितकेगु कुतः जुयाच्वंगु खः । अले थ्व “घोषक” फिल्मय् कर्मालिसे हिरोइन कथं आशिष्मा नकःमियात कायेगु मति तयातःगु खः, तर आः वयाः आशिष्मा नं इहिपा यानाः अमेरिकाय् तिपू जीवन हनेत वंबलय् “घोषक”य् हिरोइनया नं समस्या वःगु दु । आः थ्व फिल्मय् हिरो हिरोइन सु जुइगु खः धइगु खँ लिपा हे जक सीदइ ।

आशिष्माया कर्मालिसे म्हितेगु इच्छा

नेपालभाषाया फिल्म ख्यलय् अतिकं लोकंह्वाःम्ह हिरोइन आशिष्मा नकःमिया नेपाःया हे लोकंह्वाःम्ह हिरो कर्मालिसे छगू फिल्म म्हितेगु इच्छा दुगु जुयाच्वन । कर्मां “पटाचारा” व “कृषा गौतमी” नांयागु निगू नेवाः फिल्मय् थःसिबें थकालिम्ह मेलिना मानन्धरलिसे हिरो जुयाः म्हितेधुंकूगु दु । तर आशिष्माया इच्छा धाःसा कर्मां नेवाः फिल्म म्हितेगुलिइ नुगः उलि क्वमसायेकूगुलिं पुवने मफुत । आशिष्मां कर्मालिसे फिल्म म्हिते धकाः इच्छा पुवंकेगु कुतः “घोषक”य् जक जूगु मखु , मेगु छगू फिल्मया निंतिं नं जूगु दु । उगु फिल्मया नां “आः छु याये” खः । न्यय्गू लख तुइक दयेकेगु धकाः घोषणा याःगु बीग बजेट फिल्म “आः छु याये” या निर्देशक समीर बलामि खः ।

थ्व “आः छु याये” फिल्मय् नं कर्मायात हिरो व आशिष्मायात हिरोइन कयाः फिल्म दयेकेगु ग्वसाः ग्वःगु खः । उकिया निंतिं कर्मालिसे स्वापू नं तःगु खः । तर निर्माण पक्ष व कर्मा दथुइ खँल्हाबल्हा ताःलायेमफुत । अले आशिष्माया कर्मालिसे हिरोइन जुयाः फिल्म म्हितेगु इच्छा हाकनं पूमवन । आः थ्व फिल्मय् कर्मा हिरो जुयाः म्हिते हे धाःसां आशिष्मां इहिपा लिपा आः तिपु जीवनय् हे थःत पायेगु क्वःछिनाः फिल्म मम्हितेगु धकाः निर्णय याये धुंकूगुलिं आशिष्मा व कर्माया जोडी फिल्मय् झीसं स्वये मखनीगु जूगु दु ।