ने. सं. ११४६ तछलागा आमै -

ख्वपय् साउन लछि ‘सिलु महाद्यः’ या मेला

ख्वप (नेपालभाषा टाइम्स) – ताःई न्ह्यःनिसें दिनाच्वंगु थनया लाय्कूस्थित ऐतिहासिक व धार्मिक महत्वं जाःगु ‘सिलु महाद्यः’ या मेला हाकनं न्ह्याकीगु जूगु दु । थनया लाय्कुलिइ च्वंगु सिलु महाद्यःया मेला हाकनं न्ह्याकेगु निंतिं ताःई न्ह्यःनिसें दिनाच्वंगु नित्यपुजालिसें होम, रुद्री आदि पुजा तकं याःगु दु ।

लाय्कू सम्पदा संरक्षण कोषया ग्वसालय् जुइगु उगु मेला न्ह्याकेगु ल्याखं वंगु साउन २७ गते शनिवाः महाद्यःया देगः परिसरय् होम व रुद्री पुजा याःगु खः ।

वि.सं. १९९० सालया विनाशकारी तःभुखाचं देगः दुना वनेवं तत्कालीन इलय् राणा शासनया इलय् महाद्यःया उगु देगः शैलीं गुम्बज शैलीं दयेकाः सख्वाः पाना बिउगु खःसा उकिं यानाः देगःया आकार नं फसिथें च्वनेवं उगु देगःयात ‘फसि देगः’ धायेगु याना हःगु खः । ९० साललिपा देगलय् नियमित रुपं जुइ मफयाच्वंगु नित्यपुजा हाकनं निरन्तरता बीगु तयारीकथं उगु धार्मिक अनुष्ठान याःगु खः ।

थुकथं हे २०७२ सालया विनाशकारी भुखाचं नं उगु देगःयात बांमलाक क्षति यायेवं ख्वप नगरपालिकां ९० साल न्ह्यःया हे शैलीं देगःया पुनःनिर्माण याःगु खः । नगरपालिकां पुनःनिर्माण यायेवं ख्वप लाय्कूया हे शान जुयाच्वंगु दु ।

वइगु साउन १ गतेनिसें लछितक सिलु महाद्यःया मेला न्ह्याइ । मेलाज्वःछि देगः खुल्ला याइगु जूगु दु । मेलाया तयारीकथं वंगु विहीवाः उगु देगःया खापा न्हापांखुसी चायेकाः दुनेच्वंगु महाद्यःया यचुपिचु याःगु खः । ख्वप नगरपालिका, पुरातत्व विभाग, दरवार हेरचाह अड्डा, जिल्ला प्रहरी ज्याकूया समन्वयय् नेपाल कला विश्वविद्यालयया प्रा. सत्यराम सुवाल लगायतया सम्पदाप्रेमीतय् पुचलं देगः दुने व पिने यचुपिचु याःगु खः ।

झिंन्यासः दँ पुलांगु सिलु महाद्यःया देगः थनया हे ऐतिहासिक सम्पदामध्ये छगू व महत्वपूर्ण धार्मिकस्थलकथं कायेगु यानातःगु दु । थन साउन लछियंकं विशेष पुजा व मेला लगे जुइगु परम्परा दया वयाच्वंगु दु । थुगु देगःयात आः न्हापा थें बन्द याना मतसे बहनि आरति व भजना व्यवस्था यानाः रात्रीकालीन पर्यटन विकास यायेगु व धार्मिक पर्यटक अप्वयेकेगु योजना दुगु सम्पदा अभियन्ता जीआर रंजितं कनादिल । थुकिया निंतिं सत्यराम सुवालया नेतृत्वय् राजोपाध्यायतलिसे जानाः थुकिया निंतिं तयारी जुयाच्वंगु दु ।

जुजु जितामित्र मल्लं दयेकूगु धयातःगु थ्व देगलय् नित्यपुजा शुरु जूगुयालिसें देगःया धार्मिक गतिविधि नं आः सक्रिय जुयाः च्वन्ह्याः वनीगु व स्थानीय सम्पदा संरक्षणय् नं सकारात्मक योगदान जुइगु विश्वास ग्वसाः खलकं प्वंकूगु दु ।