सम्पदाया गैरकानुनी निकासी पनेत चेतनामूलक अभिमुखीकरण

येँ (नेपालभाषा टाइम्स) – धार्मिक, सांस्कृतिक व पुरातात्विक सम्पदाया गैरकानुनी निकासी पनेत चेतनामूलक अभिमुखीकरण जुल । पुरातत्व विभागं अज्याःगु सम्पदाया गैरकानुनी रुपं जुइगु निकासी पनेत निन्हुया चेतनामूलक अभिमुखीकरण बिउगु खः ।

ज्याझ्वःया उलेज्या यासें पुरातत्व विभागया महानिर्देशक सौभाग्य प्रधानाङ्गं नेपालं खुया यंकूगु मूर्तिमध्ये ४०९ गूया निवेदन प्राप्त जूगु व उकीमध्ये ९६ गू सम्पदा देय्या हे थीथी थासं प्राप्त जूगु जानकारी बियादिल । अथेहे २०३ गू विदेशं लित हःगु नापं ९५ गू मूर्ति विदेशं लित हयेगु प्रक्रियाय् दुगु नं वय्कलं कनादिल ।

थुकथं खुया यंकाः विदेश थ्यनेधुंकूगु व उकियात लित हयाः साविकया थासय् पुनःस्थापना यायेत थीथीकथंया हाथ्यात दयाच्वंगुलिं उकियात संबोधन यायेत कार्यविधि तयार यानागु विभागं न्ह्यथंगु दु । विभागं तयार याःगु मस्यौदायात कयाः सरोकारवाला निकायया दथुइ सहलह यानाः उकियात अन्तिम रुपं बीगु नं विभागया महानिर्देशक प्रधानाङ्गं कनादिल ।

सांस्कृतिक व पुरातात्विक सम्पदा क्षेत्रय् ज्यागु निकायया निंतिं उगु अभिमुखीकरण ज्याझ्वः यानागु विभागया प्रवक्ता सन्दीप खनालं जानकारी बियादिल । अभिमुखीकरणय् खुया यंकूगु सम्पदाया विषयय् केन्द्रीत जुयाः खुगू प्रस्तुतिकरण नं बिउगु खः ।