झी पुचः विराटनगरया नेपालभाषा प्रशिक्षण कक्षा

येँ (नेपालभाषा टाइम्स) – झी पुचः विराटनगरया ग्वसालय् बाःछियंकंया नेपालभाषा प्रशिक्षण कक्षा संचालन याःगु दु । पुचःपाखें न्हू पुस्तायात लक्षित यानाः नेपालभाषा संरक्षण, संवद्र्धनलिसें थःगु मांभाय्प्रति रुचि, आत्मविश्वास अप्वयेकेगु, भाषा, संस्कृति व म्हसीका बारे जानकारी बीगु ल्याखं वंगु तछलागा त्रयोदशि आइतवाःनिसें उगु कक्षा संचालन याःगु खः ।

पुचःया नायः शरद श्रेष्ठया सभापतित्वय् जूगु भाषा प्रशिक्षण कक्षाया उलेज्या समाजसेवीलिसें पुचःया सल्लाहकार सुदर्शनबहादुर श्रेष्ठं यानादीगु खः । झी पुचःया थःगु हे सभाकक्षय् न्ह्याइगु नेपालभाषा प्रशिक्षण कक्षाया सहजीकरण भाषाविद्लिसें संस्कृतिया ज्ञाता गणेश वज्राचार्यं यानादी ।
वइगु साउन १० गतेतक बाःछियंकं न्ह्याइगु कक्षाय् नेपालभाषाया आधारभूत बोलीचाली, च्वये ब्वने सयेकेगु, शुद्ध उच्चारण, ब्याकरणलिसें भाषा संस्कृति बारे प्रशिक्षण बी । पुचलं बिउगु जानकारीकथं प्रशिक्षणय् नीम्ह मिसा व झिंन्याम्ह मिजं यानाः मुक्कं स्वीन्याम्हेसिनं ब्वति कयाच्वनादीगु दु ।

प्रशिक्षण उलेज्याझ्वलय् पुचःया मूछ्याञ्जे संजय श्रेष्ठ, छ्याञ्जे सञ्जु शाक्य, सल्लाहकारपिं सुदर्शनबहादुर श्रेष्ठ, शान्ति मल्ल, पुचःया पुलांम्ह नायः हरिबहादुर श्रेष्ठ, लोकेन्द्र मल्ल, सहजकर्ता वज्राचार्यं नेपालभाषा संरक्षण, पुस्तान्तरण, भाषाया महत्व व आवश्यका, म्हसीका, संस्कृति, सम्पदा ल्यंकेत म्हितेमाःगु भूमिकाया बारे थःथःगु नुगःखँ तयादीगु खः ।

पुचलं नेपालभाषा, कला, संस्कृति, रीति, परम्पराया संरक्षण, संवद्र्धन व न्हू पुस्तायात लःल्हायेगु ल्याखं निरन्तर रुपं थुकथंया ज्याझ्वः याना वयाच्वंगु दु ।