भाषासेवी शाक्यया न्यापु म्येँया म्युजिक भिडियो

येँ(नेपालभाषा टाइम्स)- नेपालभाषा सेवी नापं साहित्यकार निरञ्जनरत्न शाक्यं च्वयादीगु न्यापु म्येँया म्युजिक भिडियो कन्हय् छगू ज्याझ्वःया दथुइ सार्वजनिक यायेत्यंगु दु ।

नेपाल संवत् न्हूदँ राष्ट्रिय समारोह समितिया पुलांम्ह नायःलिसें नेवाः देय् दबूया केन्द्रीय दांभरिं तकं जुयाच्वनादीम्ह शाक्यं च्वयादीगु न्यापुं म्येँया म्युजिक भिडियो कन्हय् पितब्वज्या यायेत्यंगु खः ।
पितब्वज्या जुइत्यंगु न्यापुँ म्येँया म्युजिक भिडियोया निर्देशन नांजाःम्ह निर्देशक रामकृष्ण खड्गी यानादीगु खः ।

पितब्वज्या जुइत्यंगु म्युजिक भिडियोया म्येँय् रिता महर्जनया सः दुथ्यानाच्वंगु दुसा संगीत नं वय्कलं हे तयादीगु खः । ‘यःम्ह छ, ययेकूम्ह छ’ म्येँय् मिङमा शेर्पा, ‘अय्लाः अय्लाः’ म्येँय् भूपेन्द्र वज्राचार्य, ‘वइबिल छ’ म्येँय् योगेश वैद्यया सः दुथ्यानाच्वंगु दु ।

म्युजिक भिडियोया छाँयाकनं रक्की महर्जन व लूजः सिंहं यानादीगु खःसा सम्पदान बालकृष्ण वंशीं यानादीगु खः । कन्हय् शनिवाः सीटीसी मलय् म्युजिक भिडियो सार्वजनिक याइगु जुयाच्वंगु दु ।
भाषासेवी शाक्यं थीथी इलय् च्वयादीगु म्येँयात म्युजिक भिडियोया रुपय् पिथनेत्यंगु खः ।