गलत समाचार सम्प्रेषण याइम्हेसित १० दँया कैद

गबलें गबलें म्वाःमदुगु घटना जूगु धकाः प्रहरीयात झंगः लायेगु ज्या याइगु घटना समचारय् पिहां वःगु झीसं न्यना वयाच्वनागु खः । अथे हे अज्याःगु हे गलत व फय्गं समाचारत सामाजिक संजालय् पोष्ट यायेगु जक मखु, पत्रपत्रिकाय् तकं सम्प्रेषण जुया वयेगु याः । थज्याःगु ज्या याइपिंत नेपालय् आतक थज्याःगु हे सजाय बीगु धइगु कानुन मदुनि । तर, मलेशियाय् अज्याःगु गलत वा फय्गं समाचार सम्प्रेषण याइपिनिगु निंतिं न्हूगु कानुनया प्रस्ताव याःगु दु । प्रस्तावित कानुनकथं गलत वा फय्गं समाचार सम्प्रेषण याइपिंत १० दँ तकया सजाय जुइगु जूगु दु । उगु प्रस्तावित न्हूगु कानुनकथं गलत समाचार प्रवाह याइम्हेसित जेल सजाय जक मखु, १ गू लाख नीच्याद्वः अमेरिकी डलर जरिवाना वा निगुलिं सजाय बीगु जूगु दु ।

थ्व इलय् मलेशियाय् राष्ट्रिय चुनावया तयारी जुयाच्वंगु दुसा व स्वयां न्ह्यः हे उकथंया प्रस्ताव अनया संसदय् पेस याःगु खः । प्रस्तावित न्हूगु कानुनय् गलत समाचार धायेबलय् ‘गुगु समाचार, सूचना, तथ्यांक वा रिपोर्ट पूर्णरुपं वा आंशिक रुपं गलत धइगु थुइकी’ धइगु खँ न्ह्यथनातःगु दु । अथे हे ब्लग, सामाजिक संजाल, सार्वजनिक मंचयात नं उगु प्रस्तावं कःघाइगु जूगु दुसा गलत समाचार प्रकाशन याइपिं देशय् दुने वा पिने न्ह्याथाय् जूसां उगु कानुन लगे जुइगु जक मखु, मलेशियन नागरिक बाहेकं सुं नं विदेशी नागरिकं नं अज्याःगु ज्या यात धाःसा वयात नं उगु कानुन लागू जुइ ।विदेशी कानुनया हकय् धाःसा इमिगु अनुपस्थितिइ नं इमित सजाय न्यंके फइगु व्यवस्था न्हूगु कानुनय् यानातःगु दु । उखे न्हूगु प्रस्तावित कानुनयात कयाः आलोचकतय्सं विरोधी वा विपक्षीतय्त क्वत्यलेगु ल्यखं हःगु प्रस्ताव धासें उकिया विरोध यानाच्वंगु दु ।

सम्बन्धित बुखँ

LEAVE YOUR COMMENTS