ब्लाय्क होलया अनुसन्धान याःपिंत नोबेल सिरपाः

एजेन्सी – ब्लायक होलयात थुइकेगु निंतिं उल्लेखनिय ज्या याःपिं स्वम्ह वैज्ञानिकतय्त सन् २०२० या भौतिक विज्ञानया नोबेल पुरस्कार बिइगु जूगु दु ।

स्टकहोमय् म्हिगः जूगु घोषणा कथं वैज्ञानिकत रोजर पेनरोज, रेनहर्ड जेंजेल, व एन्ड्रिया गेजयात नोबेल सिरपाः बीगु घोषणा याःगु खः । घोषणा सभाय् भौतिक विज्ञान पुरस्कार कमिटीया प्रमुख डेविड हेविल्यान्डं धयादीगु दु, ‘थ्व दँया पुरस्कार ब्रम्हाण्डया बारे दकलय् अजूचायापुगु खँ यात कयाः बीगु जूगु दु।’ ब्लाय्क होल ब्रम्हाण्डया अज्याःगु ब्वः खः गन गुरुत्वाकर्षण थुलि अप्वः दइकि थनं प्रकाश तकं लिहां वयेफइमखु ।

बेलायतया भौतिक वैज्ञानिकत रोजर पेनरोजं ब्लाय्क होल अल्बर्ट आइन्स्टाइनया जनरल रिलेटिबिटीया सिद्धान्तया लिच्वः खः धकाः न्ह्यब्वःगु खः । अथेहे रनेहार्ड व एन्ड्रिया गेजं झीगु आकाश गंगा मिल्की वेया केन्द्रय् छगू सुपरम्यासिभ ब्लाय्क होल दु धयागु दकलय् ठोस प्रमाण बिउगु खः ।