आर्थिक सूचक सकारात्मक दु : प्रधानमन्त्री

येँ – प्रधानमन्त्री केपी शर्मां चालु आर्थिक दँया न्याला दुने आर्थिक सूचक सकारात्मक रुपं न्ह्याःवंगु खँ धयादीगु दु । प्रतिनिधि सभाया आइतवाःया बैठकय् न्ववासें प्रधानमन्त्री ओलीं चालु आवया न्यालाया दुने राजश्व संकलन ३२ प्रतिशत व पूँजीगत खर्च २५.३ प्रतिशतं अप्वःगु व सरकारी खर्च थगुनेया तुलनाय् २० प्रतिशत म्हो जूगु जानकारी बियादीगु खः ।

अथेहे थ्व अवधि दुने मूल्यवृद्धि ३.७ प्रतिशत जक जूगु, वैदशिक सहायात १ खर्ब ६२ अर्ब, ७२ करोड वयेधुंकूगु, उद्योग व्यवसायय् २५ प्रतिशत लगानी अप्वःगु व व्यापारघाटा १.०५ प्रतिशतं म्हो जूगु नं धयादीगु खः । अथेहे वय्कलं फास्ट ट्र्याकया ज्या उत्साहजनक जूगु धासें फुक्क सुचं मुंकेगु ज्या जुयाच्वंगु खँ नं धयादीगु दु ।

राष्ट्रिय गौरवया आयोजना अनुगमन यायेगु निंतिं प्रधानमन्त्री मन्त्रिपरिषदया कार्यालयय् डिजिटल एक्सन रुम दयेकेत्यनागु खँ नं कनादिल । थ्व झ्वलय् वय्कलं योगदानय् आधारित सामाजिक सुरक्षा योजना कार्यान्वयन ज्या पूवंक सदनया ज्या जूगु खँ धयादीगु दु । अथेहे थ्व हे दँय् यक्व नेपाःमितय्त परिचय पत्र बीगु निंतिं राष्ट्रिय परिचयपत्र विभाग स्थापना जुइधुंकूगु खँ नं कनादिल ।

वय्कलं कोदारी राजमार्ग वइगु वैशाखनिसें संचालनय् वइगु दावी नं यानादीगु खः । अथेहे वइगु वैशाख तकया दुने हे नेपालं नं थःगु हे भूउपग्रह छ्वयेगु तयारी यानाच्वंगु खँ नं कनादिल । रेलया म्हगस पूवंकेत रसुवागढी–येँ, येँ–लुम्बिनी व वीरगंज–येँया सम्भाव्यता अध्ययन जुयाच्वंगु खँ नं कनादिल ।