हुलमुल मजुइक जनबहाद्यः जात्रा याइगु

येँ- जनबहाः द्यःया रथ दयेकेगु ज्या न्ह्याःगु दु । थ्वहे वइगु वैशाख ७ गते जनबहाः द्यः साले माःगुलिं रथ दयेकेगु ज्या न्ह्याःगु खँ सेतो मच्छिन्द्रनाथ रथ व्यवस्थापन समितिं कजिं नीलकाजी शाक्य कनादीगु दु । थुगुसी जात्राय् ब्वति काइपिसं अनिवार्य रुपं मास्क तयेमाःगु, जात्राया झ्वलय् हुलमुल मजुइकेगु कथं तयारी जुयाच्वंगु खँ जात्रा व्यवस्थापन समितिया कजि लिसें २५ वडाया वडाध्यक्ष नीलकाजी शाक्यं ‘नेपालभाषा टाइम्स’यात कनादीगु दु ।

जात्राया निंतिं येँ महानगरपालिका स्वास्थ्य विभागलिसे सहकार्य यानाः निःशुल्क मास्क वितरण यायेगु व्यवस्था याइगु जूगु दु । उकथं हे रथयात्राया झ्वलय् कोरोना भाइरस संक्रमण मजुइकेत म्हो जक मनूत तयाः रथ सालेगु व्यवस्था यानागु जानकारी नं वय्कलं बियादिल ।
जात्रायात व्यवस्थित रुपं न्ह्याकेगु निंतिं थीथी उपसमिति नं गठन यानागु जानकारी नं अध्यक्ष शाक्यं बियादीगु दु ।

जात्राया झ्वलय् सामाजिक दुरी कायम यायेगुया लिसें द्यः सालेगु स्वयां झिंन्यागू मिनेट न्ह्यः हे थीथी सांस्कृतिक बाजायात न्ह्यःने छ्वयेगु कथं तयारी जुयाच्वंगु दु । झिंन्यागू मिनेट न्ह्यः हे बाजा न्ह्याः वन धाःसा रथ सालेत अःपुइगु जूगुलिं अज्याःगु व्यवस्था यानागु खँ नं वय्कलं कनादिल ।

जात्राया झ्वलय् मास्कया लिसें अनिवार्य रुपं सेनेटाइजर छ्यलेगु निंतिं माःगु व्यवस्था येँ महानगरपालिकां याइगु जूगु दु । वंगु दँय् हलिंन्यंकं कोरोना भाइरस न्यनावनेवं सरकारं याःगु ‘लकडाउन’ या कारणं जनबहाः द्यःया जात्रा मजूगु खःसा थुगुसी धाःसा जात्रा यायेगु तयारी जुयाच्वंगु दु । थुगुसी जात्रा यायेगु निंतिं रथयात्रा व्यवस्थापन समितिं वंगु छुं न्हिं न्ह्यः जक जात्रा लिसे सम्बन्धित थीथी पुचः व जात्राया रुटय् लाःगु संघसंस्था लिसे सहलह ब्याकूगु खः ।

थुगुसी नं कोरोना भाइरसया संक्रमण अप्वया च्वंसां जिल्ला प्रशासनं जात्राया बारे छुं निर्णय याःगु मदुनि । बिस्काः जात्रा दिकेगु निर्णयया विरोध जूगु कारणं नं प्रशासन सुम्क च्वनाच्वंगु खनेदु ।