पप्पुयात हानं ठेक्का बीत्यंगुया विरोध

येँ – कारवाही यायेमाःगु ठेकेदार कम्पनी पप्पु कन्स्क्ट्रक्सनयात हे हाकनं मेगु आयोजनाया ठेक्का बीत्यंगु खँय् सांसदतय्सं विरोध याःगु दु । ठेक्का कयाः इलय् ज्या मयाइम्ह ठेकेदारयात छाय् हानं मेगु ठेक्का बीत्यनागु धासें सांसदपिं टोपबहादुर रायमाझी, यज्ञराज सुनुवार व दुर्गा पौडेलपिंसं विरोध प्वंकूगु खः ।

संसद विकास तथा प्रविधि समितिया म्हिगः जूगु बैठकय् न्ववाःपिं सांसदतय्सं लाइसेन्स खारेज हे यायेमाःगु कम्पनीयात राष्ट्र बैंकं २ अर्ब तकाया न्हूगु ठेक्का बीत्यंगु धासें विरोध याःगु खः । नेपाल राष्ट्र बैंकं बालुवाटारय् च्वंगु भवन दयेकेगु निंतिं पप्पु कन्स्ट्रक्सनयात ल्यःगु खः । अथेहे सांसदतय्सं पप्पु कन्स्ट्रक्सनया सञ्चालक हरिनारायण रौनियारयात संसदया विकास समितिइ दुजः दयेकूगु खँय् नं विरोध याःगु दु ।

विकास निर्माणया ज्याय् सरकारयात झंगः लानाच्वंम्ह व्यक्तियात समितिया दुजलय् तयेगु उचित मजू धासें वयात तत्काल समितिं चीकेमाःगु माग नं सांसदतय्सं याःगु दु । विकास समितिया सभापति कल्याणी खड्कां ज्या मयाइपिं ठेकेदारतय्त उन्मुक्ति बीगु ज्या जुइ मखु धासें अज्याःपिं ठेकेदारया बारे अध्ययन यानाः कारबाहीया निंतिं निर्देशन बीगु खँ धयादिल ।

थ्वहे झ्वलय् पप्पु कन्स्ट्रक्सनया अध्यक्ष सुमित रौनियारयात ज्वनेत प्रहरी परिचालन जूगु दु । पप्पुयात ज्वनेत रौतहट जिल्ला अदालतं आदेश बिउगु खः । डुंगा दुर्घटना जुयाः न्याम्ह मनू सीवं ताँ दयेकूम्ह ठेकेदार दोषी जूगु धासें अदालतं वयात ज्वनेत उजं बिउगु खः ।

सम्बन्धित बुखँ

LEAVE YOUR COMMENTS