कर्णालीया मुख्यमन्त्रीयात ओलीया अविश्वास

येँ – कर्णाली प्रदेशया मुख्यमन्त्री महेन्द्र बहादुर शाहीयात बियातःगु समर्थन प्रधानमन्त्री ओली पक्षं लित काःगु दु । एमालेया हे नेपाल–खनाल पक्षं धाःसा थःपिनिगु समर्थन जारी हे दनिगु खँ धाःगु दु । म्हिगः वीरेन्द्रनगरय् च्वंगु ओली पक्षया संसदीय दलया बैठकं नेकपा माओवादी केन्द्रपाखें मुख्यमन्त्री जुयाच्वंम्ह शाहीयात बियातःगु समर्थन लित कायेगु निर्णय याःगु खः ।

नेकपा गठन जुइ न्ह्यः तत्कालीन एमालें संविधानया धारा १६८ (२) कथं सरकार गठनया निंतिं माओवादी केन्द्र संसदीय दलया नेता शाहीयात समर्थन बिउगु खः । उगु धारा कथं गुगुं नं दलया स्पष्ट बहुमत मदुगु अवस्थाय् निगू वा निगू स्वयां अप्वः दलया समर्थनय्
बहुमत दुगु प्रदेश सभा सदस्ययात मुख्यमन्त्री नियुक्ति याये फइ । उगु इलय् एमालेया २० व माओवादी केन्द्रया १३ म्ह सांसदया समर्थनय् शाही मुख्यमन्त्री जूगु खः ।

मुख्यमन्त्री शाहीयात बियातःगु समर्थन लित कयागु धाःसां नेपाल–खनाल पक्षं धाःसा संसदीय दलया निर्णय थःपिंत अमान्य जूगु खँ धाःगु दु । नेपाल–खनाल पुचःया सांसद अमरबहादुर थापां पार्टीया छगू गुटं याःगु निर्णय थःपिंत मान्य जुइ मखु धासें आः नं थःपिनिगु समर्थन शाहीया पक्षय् दुगु खँ धयादीगु दु । वय्कलं धयादी, ‘एमालें छप्पँ जूगु इलय् आपसी सहमति व सहलह बिना सःतूगु बैठकं याःगु निर्णय जिमिगु नितिं मान्य जुइमखु, यकःति रुपं याःगु निर्णय गुलि वैधानिक जुइ धइगु न्ह्यसः ब्वलंगु दु, उकिया कार्यान्वयन गुकथं जुइ ?’

म्हिगः संसदीय दलया नेता यामलाल कँडेलया अध्यक्षताय् च्वंगु दलया बैठकं उगु निर्णय याःगु खः । उगु बैठकय् ओली पक्षया झिम्ह जक सांसद उपस्थित जूगु खः । बैठकं एमालेपाखें सरकारय् वंपिं स्वम्ह मन्त्री प्रकाश ज्वाला, दल रावल व नन्दसिंह बुढायात लित सःतेगु निर्णय नं याःगु दु । बैठकय् स्वम्ह मन्त्री नं मवःगु खः ।